ಬೆಂಗಳೂರು, ಜು.8: ಸಿಲಿಕಾನ್ ಸಿಟಿಯ ಬಿಡುವಿಲ್ಲದ ರಸ್ತೆಗಳಲ್ಲಿ ಒಂದಾದ ಪ್ಯಾಲೇಸ್ ರಸ್ತೆಯಲ್ಲಿ ನಿನ್ನೆ ಸಂಜೆ ಭೀತಿ ಹಾಗೂ ಆಶ್ಚರ್ಯದ ವಾತಾವರಣ ಸೃಷ್ಟಿಯಾಗಿತ್ತು. ರಸ್ತೆಯ ಮಧ್ಯಭಾಗದಲ್ಲೇ ಬೃಹತ್ ನಾಗರಹಾವೊಂದು ಪ್ರತ್ಯಕ್ಷವಾಗಿ, ಹೆಡೆಬಿಚ್ಚಿ ಕುಳಿತಿದ್ದರಿಂದ ವಾಹನ ಸವಾರರು ಹಾಗೂ ಸ್ಥಳೀಯರು ಕೆಲಕಾಲ ಆತಂಕಕ್ಕೊಳಗಾಗಿದ್ದರು. ನಿನ್ನೆ ಸಂಜೆ ಸುಮಾರಿಗೆ ಪ್ಯಾಲೇಸ್ ರಸ್ತೆಯ ಮುಖ್ಯ ರಸ್ತೆಗೆ ಬಂದ ನಾಗರಹಾವು, ರಸ್ತೆಯ ಮಧ್ಯದಲ್ಲೇ ಹೆಡೆಬಿಚ್ಚಿ ಕೆಲಕಾಲ ಅಲ್ಲೇ ಇತ್ತು. ಇದನ್ನು ನೋಡಿದ ಬೈಕ್ ಹಾಗೂ ಕಾರು ಸವಾರರು ಹಾವಿಗೆ ಮತ್ತು ತಮಗೂ ಅಪಾಯವಾಗದಂತೆ ವಾಹನಗಳನ್ನು ಕೆಲ ಹೊತ್ತು ಅಲ್ಲೇ ನಿಲ್ಲಿಸಿದರು. ರಸ್ತೆ ಮಧ್ಯೆ ಹಾವು ಪ್ರತ್ಯಕ್ಷವಾದ ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳೀಯರು ಮತ್ತು ಹಾದಿಹೋಕರು ಹಾವನ್ನು ನೋಡಲು ಮುಗಿಬಿದ್ದರು. ವಿಪರೀತ ವಾಹನ ಸಂಚಾರವಿರುವ ಪ್ಯಾಲೇಸ್ ರಸ್ತೆಯಲ್ಲಿ ಹಾವು ಹೆಡೆಬಿಚ್ಚಿ ಕುಳಿತಿದ್ದರಿಂದ ಸುಮಾರು 30 ರಿಂದ 40 ನಿಮಿಷಗಳ ಕಾಲ ಸಂಚಾರಕ್ಕೆ ಕೊಂಚ ಅಡಚಣೆ ಉಂಟಾಯಿತು. ಮುಖ್ಯವಾಗಿ ಬಿಎಂಟಿಸಿ ಬಸ್ ಸೇರಿದಂತೆ ದೊಡ್ಡ ವಾಹನಗಳ ಸಂಚಾರಕ್ಕೆ ಸಮಸ್ಯೆ ಎದುರಾಯಿತು. ರಸ್ತೆಯಲ್ಲಿ ಸಂಚಾರ ಸ್ಥಗಿತಗೊಂಡ ವಿಷಯ ತಿಳಿಯುತ್ತಿದ್ದಂತೆ ತಕ್ಷಣವೇ ಸ್ಥಳಕ್ಕೆ ಬಂದ ಪೊಲೀಸ್ ಸಿಬ್ಬಂದಿ ವಾಹನಗಳನ್ನು ನಿಯಂತ್ರಣ ಮಾಡಿದ್ದಾರೆ. ಇದೇ ವೇಳೆ ಸ್ಥಳಕ್ಕೆ ಆಗಮಿಸಿದ ಉರಗ ತಜ್ಞರು ನಾಗರಹಾವನ್ನು ಹಿಡಿದು ರಕ್ಷಣೆ ಮಾಡಿದ್ದಾರೆ.
ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
