ಟೆನಿಸ್ ಜಗತ್ತಿನ ಅತ್ಯಂತ ಪ್ರತಿಷ್ಠಿತ ಗ್ರ್ಯಾಂಡ್ ಸ್ಲಾಮ್ ಟೂರ್ನಿಯಾದ ವಿಂಬಲ್ಡನ್ 2026ರ ಮಹಿಳಾ ಸಿಂಗಲ್ಸ್ ಫೈನಲ್ ಪಂದ್ಯದಲ್ಲಿ ಜೆಕ್ ಗಣರಾಜ್ಯದ ಯುವ ತಾರೆ ಲಿಂಡಾ ನೊಸ್ಕೋವಾ ಐತಿಹಾಸಿಕ ಜಯ ಸಾಧಿಸಿದ್ದಾರೆ. ಭಾನುವಾರ ನಡೆದ ರೋಮಾಂಚಕ ಮುಖಾಮುಖಿಯಲ್ಲಿ ಒಂಬತ್ತನೇ ಶ್ರೇಯಾಂಕದ ನೊಸ್ಕೋವಾ, ತಮ್ಮದೇ ದೇಶದ ಹಿರಿಯ ಆಟಗಾರ್ತಿ ಕ್ಯಾರೊಲಿನಾ ಮುಚೋವಾ ವಿರುದ್ಧ 6-2, 5-7, 6-3 ಸೆಟ್ಗಳ ಅಂತರದಲ್ಲಿ ಭರ್ಜರಿ ಗೆಲುವು ದಾಖಲಿಸಿ, ತಮ್ಮ ವೃತ್ತಿಜೀವನದ ಮೊದಲ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡರು.
ಗೆಳೆತಿಯರ ನಡುವಣ ಪೈಪೋಟಿ:
ಈ ಬಾರಿಯ ಫೈನಲ್ನಲ್ಲಿ ಜೆಕ್ ಗಣರಾಜ್ಯದ ಆಟಗಾರ್ತಿಯರಾದ ಲಿಂಡಾ ನೊಸ್ಕೋವಾ ಮತ್ತು ಕ್ಯಾರೊಲಿನಾ ಮುಚೋವಾ ಮುಖಾಮುಖಿಯಾಗಿದ್ದು ವಿಶೇಷವಾಗಿತ್ತು. ಅದರಲ್ಲೂ ಅವರಿಬ್ಬರೂ ಆತ್ಮೀಯ ಗೆಳತಿಯರು ಎಂಬುದು ಮತ್ತೊಂದು ವೀಶೇಷ.
ಕಳೆದ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಇಬ್ಬರೂ ಜೊತೆಯಾಗಿ ಡಬಲ್ಸ್ ಆಡಿದ್ದರು. ಹೀಗಾಗಿ ಇಬ್ಬರು ಆಪ್ತ ಸ್ನೇಹಿತೆಯರು ವಿಶ್ವದ ಅತ್ಯಂತ ಪ್ರತಿಷ್ಠಿತ ವೇದಿಕೆಯಲ್ಲಿ ಮುಖಾಮುಖಿಯಾಗಿದ್ದು ಜಗತ್ತಿನಾದ್ಯಂತ ಟೆನಿಸ್ ಪ್ರೇಮಿಗಳ ಗಮನ ಸೆಳೆಯಿತು.
ಗೆಳೆತನವನ್ನು ಪಕ್ಕಕ್ಕಿಟ್ಟು ಶುರುವಾದ, ಈ ಪಂದ್ಯದಲ್ಲಿ ಆರಂಭದಿಂದಲೇ ಭರ್ಜರಿ ಫಾರ್ಮ್ ಪ್ರದರ್ಶಿಸಿದ 21 ವರ್ಷದ ನೊಸ್ಕೋವಾ, ಕೇವಲ 32 ನಿಮಿಷಗಳಲ್ಲಿ ಮೊದಲ ಸೆಟ್ ಅನ್ನು 6-2 ರಿಂದ ಸುಲಭವಾಗಿ ಗೆದ್ದುಕೊಂಡರು.
ಎರಡನೇ ಸೆಟ್ನಲ್ಲೂ ಅದ್ಭುತ ಪ್ರದರ್ಶನ ನೀಡಿದ ಅವರು 5-2 ರ ಭಾರಿ ಮುನ್ನಡೆ ಸಾಧಿಸಿ ಪ್ರಶಸ್ತಿಯ ಅತ್ಯಂತ ಸಮೀಪದಲ್ಲಿದ್ದರು. ಈ ಹಂತದಲ್ಲಿ ಅವರಿಗೆ ಬರೋಬ್ಬರಿ 5 ಚಾಂಪಿಯನ್ಶಿಪ್ ಪಾಯಿಂಟ್ಗಳು ಸಿಕ್ಕಿದ್ದರೂ, ಒತ್ತಡಕ್ಕೆ ಒಳಗಾಗಿ ಡಬಲ್ ಫಾಲ್ಟ್ಗಳನ್ನು ಮಾಡಿದ್ದರಿಂದ ಪಂದ್ಯ ಕೈತಪ್ಪುವ ಆತಂಕ ಎದುರಾಯಿತು.
ಇದರ ಸಂಪೂರ್ಣ ಲಾಭ ಪಡೆದ 10ನೇ ಶ್ರೇಯಾಂಕದ ಕ್ಯಾರೊಲಿನಾ ಮುಚೋವಾ ಸತತ 5 ಗೇಮ್ಗಳನ್ನು ಗೆದ್ದು, ಎರಡನೇ ಸೆಟ್ ಅನ್ನು 7-5 ರಿಂದ ತಮ್ಮದಾಗಿಸಿಕೊಂಡರು.
ಆದರೆ ಮೂರನೇ ಹಾಗೂ ನಿರ್ಣಾಯಕ ಸೆಟ್ನಲ್ಲಿ ಅದ್ಭುತವಾಗಿ ಪುನರಾಗಮನ ಮಾಡಿದ ನೊಸ್ಕೋವಾ, ಆರಂಭದಲ್ಲೇ 3-0 ಮುನ್ನಡೆ ಕಾಯ್ದುಕೊಂಡರು. ಅಂತಿಮವಾಗಿ ತಮ್ಮ 6ನೇ ಚಾಂಪಿಯನ್ಶಿಪ್ ಪಾಯಿಂಟ್ನಲ್ಲಿ ಕ್ಲಿನಿಕಲ್ ಸರ್ವ್ ಮೂಲಕ ಪಂದ್ಯವನ್ನು ಮುಗಿಸಿ, ಪ್ರತಿಷ್ಠಿತ ‘ವೆನಸ್ ರೋಸ್ವಾಟರ್ ಡಿಶ್’ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡರು.
-
- ಮೊದಲ ಸೆಟ್: 6-2 (ಲಿಂಡಾ ನೊಸ್ಕೋವಾಗೆ ಗೆಲುವು)
- ಎರಡನೇ ಸೆಟ್: 5-7 (ಕ್ಯಾರೊಲಿನಾ ಮುಚೋವಾಗೆ ಗೆಲುವು)
- ಮೂರನೇ ಸೆಟ್: 6-3 ( ಲಿಂಡಾ ನೊಸ್ಕೋವಾಗೆ ಗೆಲುವು)
Linda Noskova is the champion 🏆
She defeats Karolina Muchova 6-2, 5-7, 6-3 to win her first Grand Slam. #Wimbledon pic.twitter.com/NJvtqHbVay
— Wimbledon (@Wimbledon) July 11, 2026
ಐತಿಹಾಸಿಕ ದಾಖಲೆಗಳು:
- ಅತ್ಯಂತ ಕಿರಿಯ ಚಾಂಪಿಯನ್: 21 ವರ್ಷದ ಲಿಂಡಾ ನೊಸ್ಕೋವಾ, 2011 ರಲ್ಲಿ ಪ್ರಶಸ್ತಿ ಗೆದ್ದಿದ್ದ ಪೆಟ್ರಾ ಕ್ವಿಟೋವಾ ನಂತರ ವಿಂಬಲ್ಡನ್ ಮಹಿಳಾ ಸಿಂಗಲ್ಸ್ ಗೆದ್ದ ಅತ್ಯಂತ ಕಿರಿಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
- ಜೆಕ್ ಆಟಗಾರ್ತಿಯರ ದರ್ಬಾರ್: ಕಳೆದ ನಾಲ್ಕು ವರ್ಷಗಳಲ್ಲಿ ವಿಂಬಲ್ಡನ್ ಪ್ರಶಸ್ತಿ ಗೆದ್ದ ಮೂರನೇ ಜೆಕ್ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ನೊಸ್ಕೋವಾ ಪಾತ್ರರಾಗಿದ್ದಾರೆ. ಇದಕ್ಕೂ ಮುನ್ನ ಮಾರ್ಕೆಟಾ ವೊಂಡ್ರುಸೊವಾ (2023) ಮತ್ತು ಬಾರ್ಬೊರಾ ಕ್ರೆಜಿಸಿಕೋವಾ (2024) ಈ ಸಾಧನೆ ಮಾಡಿದ್ದರು.
- ಟಾಪ್-10 ರ್ಯಾಂಕಿಂಗ್ಗೆ ಎಂಟ್ರಿ: ಈ ಐತಿಹಾಸಿಕ ವಿಂಬಲ್ಡನ್ ಗೆಲುವಿನೊಂದಿಗೆ ಲಿಂಡಾ ನೊಸ್ಕೋವಾ ಅವರು ಬಿಡುಗಡೆಯಾಗಲಿರುವ ನೂತನ WTA ರ್ಯಾಂಕಿಂಗ್ನಲ್ಲಿ ತಮ್ಮ ವೃತ್ತಿಜೀವನದ ಅತ್ಯುತ್ತಮ ವಿಶ್ವ ನಂ. 7 ಸ್ಥಾನಕ್ಕೇರಲಿದ್ದಾರೆ.
ಇದನ್ನೂ ಓದಿ: ವಿರಾಟ್ ಕೊಹ್ಲಿಯ ದಾಖಲೆ ಮುರಿದ ಬಟ್ಲರ್: ಮುಂದಿನ ಟಾರ್ಗೆಟ್ ರೋಹಿತ್ ಶರ್ಮಾ
ಪುರುಷರ ಫೈನಲ್ ಯಾವಾಗ?
ವಿಂಬಲ್ಡನ್ 2026ರ ಪುರುಷರ ಸಿಂಗಲ್ಸ್ ಮಹಾ ಫೈನಲ್ ಪಂದ್ಯವು ಇಂದು (ಭಾನುವಾರ, ಜುಲೈ 12, 2026) ನಡೆಯಲಿದೆ. ಭಾರತೀಯ ಕಾಲಮಾನ ರಾತ್ರಿ 8.30 ಕ್ಕೆ (IST) ಶುರುವಾಗಲಿರುವ ಈ ಪಂದ್ಯದಲ್ಲಿ ವಿಶ್ವದ ನಂ. 1 ಆಟಗಾರ ಇಟಲಿಯ ಯಾನಿಕ್ ಸಿನ್ನರ್ ಮತ್ತು ಜರ್ಮನಿಯ ತಾರೆ ಅಲೆಕ್ಸಾಂಡರ್ ಝ್ವೆರೆಫ್ ಪ್ರಶಸ್ತಿಗಾಗಿ ಸೆಣಸಾಡಲಿದ್ದಾರೆ.
