ಮ್ಯೂಚುವಲ್ ಫಂಡ್Image Credit source: jayk7/Moment/Getty Images
ನವದೆಹಲಿ, ಜುಲೈ 12: ಷೇರು ಮಾರುಕಟ್ಟೆಯಲ್ಲಿನ ತೀವ್ರ ಏರಿಳಿತಗಳ (Volatility) ನಡುವೆ, ಹೂಡಿಕೆದಾರರು ಸುರಕ್ಷಿತ ಮತ್ತು ವೈವಿಧ್ಯಮಯ ಹೂಡಿಕೆಗೆ ಒಲವು ತೋರುತ್ತಿರುವುದು ಹೆಚ್ಚಾಗಿದೆ. ಇದಕ್ಕೆ ಸಾಕ್ಷಿ ಎಂಬಂತೆ, ಮಲ್ಟಿ-ಅಸೆಟ್ ಅಲೋಕೇಷನ್ ಫಂಡ್ಗಳಿಗೆ (Multi-Asset Allocation Funds) ಬರುವ ಹೂಡಿಕೆಯು ತಿಂಗಳಿನಿಂದ ತಿಂಗಳಿಗೆ (MoM) ಭಾರಿ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಭಾರತೀಯ ಮ್ಯೂಚುವಲ್ ಫಂಡ್ ಸಂಘಟನೆಯ (AMFI) ಇತ್ತೀಚಿನ ಅಂಕಿ-ಅಂಶಗಳ ಪ್ರಕಾರ, ಜೂನ್ ತಿಂಗಳಿನಲ್ಲಿ ಮಲ್ಟಿ-ಅಸೆಟ್ ಅಲೋಕೇಷನ್ ಫಂಡ್ಗಳಿಗೆ ₹4,810.76 ಕೋಟಿ ಹೂಡಿಕೆ ಹರಿದುಬಂದಿದೆ. ಇದು ಮೇ ತಿಂಗಳ ಹೂಡಿಕೆಗೆ (₹3,928.51 ಕೋಟಿ) ಹೋಲಿಸಿದರೆ 22.46% ರಷ್ಟು ಜಂಪ್ ಆಗಿದೆ. ಹೈಬ್ರಿಡ್ ಮ್ಯೂಚುವಲ್ ಫಂಡ್ ವಿಭಾಗದಲ್ಲಿ ಅತಿ ಹೆಚ್ಚು ಹೂಡಿಕೆ ಆಕರ್ಷಿಸಿದ ಫಂಡ್ಗಳಲ್ಲಿ ಇದು ಪ್ರಮುಖವಾಗಿದೆ.
ಮಲ್ಟಿ ಅಸೆಟ್ ಫಂಡ್ಗಳಲ್ಲಿ ಹೂಡಿಕೆ ಹೆಚ್ಚಲು ಕಾರಣವೇನು?
ಜಾಗತಿಕ ರಾಜಕೀಯ ಉದ್ವಿಗ್ನತೆ (Geopolitical Tensions), ವಿದೇಶಿ ಬಂಡವಾಳದ ಹೊರಹರಿವು, ಹಣದುಬ್ಬರದ ಆತಂಕಗಳು ಮತ್ತು ಬಡ್ಡಿದರ ಹೆಚ್ಚಳದ ಭೀತಿಯಿಂದಾಗಿ ಇತ್ತೀಚೆಗೆ ಷೇರು ಮಾರುಕಟ್ಟೆಯಲ್ಲಿ ಭಾರಿ ಏರಿಳಿತಗಳು ಕಂಡುಬರುತ್ತಿವೆ. ಇಂತಹ ಸಮಯದಲ್ಲಿ ಒಂದೇ ವಲಯದಲ್ಲಿ ಹೂಡಿಕೆ ಮಾಡುವ ಬದಲು, ಅಪಾಯವನ್ನು ಕಡಿಮೆ ಮಾಡಲು ಹೂಡಿಕೆದಾರರು ವಿಸ್ತೃತ ಹೂಡಿಕೆ ತಂತ್ರವನ್ನು (Diversified Investment Strategy) ಇಷ್ಟಪಡುತ್ತಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ: ರೈಲ್ವೆ ಟಿಕೆಟ್ ನಿಯಮಗಳ ಪರಿಷ್ಕರಣೆ; ಟಿಕೆಟ್ನ ವಾಟ್ಸಾಪ್ ಸ್ಕ್ರೀನ್ಶಾಟ್, ಫೋಟೋ, ಪಿಡಿಎಫ್ ಕಾಪಿಗಳು ಮಾನ್ಯವಾ?
ಮಲ್ಟಿ-ಅಸೆಟ್ ಅಲೋಕೇಷನ್ ಫಂಡ್ ಎಂದರೇನು?
ಭಾರತೀಯ ಷೇರು ಮಾರುಕಟ್ಟೆ ನಿಯಂತ್ರಣ ಮಂಡಳಿ (SEBI) ನಿಯಮಗಳ ಪ್ರಕಾರ, ಈ ಫಂಡ್ಗಳು ಕನಿಷ್ಠ ಮೂರು ವಿಭಿನ್ನ ಅಸೆಟ್ ಕ್ಲಾಸ್ಗಳಲ್ಲಿ (ಹೂಡಿಕೆ ವಿಭಾಗಗಳು) ಹೂಡಿಕೆ ಮಾಡಬೇಕು:
- ಷೇರುಗಳು (Equities): ಕನಿಷ್ಠ 10%
- ಸಾಲಪತ್ರಗಳು (Fixed Income/Debt): ಕನಿಷ್ಠ 10%
- ಚಿನ್ನ/ಬೆಳ್ಳಿ (Commodities): ಕನಿಷ್ಠ 10%
ಷೇರು ಮಾರುಕಟ್ಟೆ ಕುಸಿದಾಗ ಚಿನ್ನ ಅಥವಾ ಡೆಟ್ ಫಂಡ್ಸ್ ಸ್ಥಿರತೆಯನ್ನು ನೀಡುತ್ತವೆ, ಇದರಿಂದಾಗಿ ಹೂಡಿಕೆದಾರರ ಒಟ್ಟಾರೆ ನಷ್ಟದ ಅಪಾಯ ಕಡಿಮೆಯಾಗುತ್ತದೆ. ಬಿಕ್ಕಟ್ಟಿನ ಸಂದರ್ಭಗಳಲ್ಲಿ ಹೂಡಿಕೆದಾರರ ಹಣವನ್ನು ಸುರಕ್ಷಿತವಾಗಿರಿಸುವುದಷ್ಟೇ ಅಲ್ಲ, ಉತ್ತಮ ಲಾಭವನ್ನೂ ಇವು ತರುತ್ತವೆ.
ಪ್ರಮುಖ ಮಲ್ಟಿ ಅಸೆಟ್ ಫಂಡ್ಗಳ ಸಾಧನೆ
ಮಾರುಕಟ್ಟೆಯ ಏರಿಳಿತದ ನಡುವೆಯೂ ಈ ವಿಭಾಗದ ಪ್ರಮುಖ ಫಂಡ್ಗಳು ಉತ್ತಮ ಆದಾಯ ನೀಡಿವೆ. ಕಳೆದ ಮೂರು ವರ್ಷಗಳಲ್ಲಿ ಇಂಥ ಯಾವ ಫಂಡ್ಗಳು ಅತ್ಯುತ್ತಮ ಆದಾಯ ತಂದಿವೆ ಎಂಬುದರ ವಿವರ ಇಲ್ಲಿದೆ:
- ನಿಪ್ಪಾನ್ ಇಂಡಿಯಾ ಮಲ್ಟಿ ಅಸೆಟ್ ಅಲೋಕೇಷನ್ ಫಂಡ್: ಸುಮಾರು 20% ಆದಾಯ ನೀಡಿದೆ.
- SBI ಮತ್ತು ಆದಿತ್ಯ ಬಿರ್ಲಾ ಸನ್ ಲೈಫ್ ಮಲ್ಟಿ ಅಸೆಟ್ ಫಂಡ್ಗಳು: ಸುಮಾರು 17% ವಾರ್ಷಿಕ ಆದಾಯ ನೀಡಿವೆ.
- ಮೋತಿಲಾಲ್ ಓಸ್ವಾಲ್ ಮಲ್ಟಿ ಅಸೆಟ್ ಫಂಡ್: ಸುಮಾರು 14% ವಾರ್ಷಿಕ ಆದಾಯ ತಂದುಕೊಟ್ಟಿದೆ.
ಇದನ್ನೂ ಓದಿ: ಕ್ರೆಡಿಟ್ ಕಾರ್ಡ್ ಹೊಂದಿರುವವರು ದಿಢೀರ್ ಮೃತಪಟ್ಟರೆ ಬಿಲ್ ಕಟ್ಟೋರು ಯಾರು? ಕುಟುಂಬದವರ ಜವಾಬ್ದಾರಿಯೇ?
ಮಲ್ಟಿ ಅಸೆಟ್ ಫಂಡ್ಸ್ನಿಂದ ತೆರಿಗೆಯ ಲಾಭ
ತಜ್ಞರ ಪ್ರಕಾರ, ಈ ಫಂಡ್ಗಳ ಮತ್ತೊಂದು ದೊಡ್ಡ ಆಕರ್ಷಣೆ ಎಂದರೆ ತೆರಿಗೆ ವಿನಾಯಿತಿ (Tax Benefit). ಯಾವ ಮಲ್ಟಿ-ಅಸೆಟ್ ಫಂಡ್ಗಳು ಷೇರು ಮಾರುಕಟ್ಟೆಯಲ್ಲಿ (Equity) ಕನಿಷ್ಠ 65% ಹೂಡಿಕೆ ಮಾಡಿರುತ್ತವೆಯೋ, ಅವುಗಳನ್ನು ತೆರಿಗೆ ಲೆಕ್ಕಾಚಾರಕ್ಕಾಗಿ ಇಕ್ವಿಟಿ ಫಂಡ್ಗಳೆಂದೇ ಪರಿಗಣಿಸಲಾಗುತ್ತದೆ. ಇದರಿಂದಾಗಿ ಹೂಡಿಕೆದಾರರಿಗೆ ₹1.25 ಲಕ್ಷದವರೆಗಿನ ದೀರ್ಘಾವಧಿ ಬಂಡವಾಳ ಲಾಭಕ್ಕೆ (LTCG) ಯಾವುದೇ ತೆರಿಗೆ ಇರುವುದಿಲ್ಲ ಮತ್ತು ಅದಕ್ಕಿಂತ ಹೆಚ್ಚಿನ ಲಾಭಕ್ಕೆ ಕೇವಲ 12.5% ತೆರಿಗೆ ಅನ್ವಯವಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
