ಬೆಂಗಳೂರು, ಜುಲೈ 7: ಕರ್ನಾಟಕದ ಸರ್ಕಾರಿ ಶಾಲಾ ವಿದ್ಯಾರ್ಥಿಗಳಿಗೆ ಸರ್ಕಾರ ಉಚಿತವಾಗಿ ಸಮವಸ್ತ್ರ ನೀಡುವ ಯೋಜನೆಯನ್ನು ಜಾರಿಗೆ ತಂದಿದೆ. ಆದರೆ ರಾಜಧಾನಿ ಬೆಂಗಳೂರು (Bengaluru) ಸೇರಿದಂತೆ ನಗರ ಪ್ರದೇಶಗಳ ಸರ್ಕಾರಿ ಶಾಲೆಗಳಲ್ಲಿ 7ನೇ ತರಗತಿ ವಿದ್ಯಾರ್ಥಿಗಳಿಗೆ ನೀಡುತ್ತಿರುವ ಚಡ್ಡಿ ಅಳತೆಯ ಬಟ್ಟೆಯೇ ಈಗ ದೊಡ್ಡ ವಿವಾದ ಮತ್ತು ಚರ್ಚೆಗೆ ಕಾರಣವಾಗಿದೆ. ಬೆಳೆಯುವ ವಯಸ್ಸಿನ ತಮಗೆ ಚಡ್ಡಿ ಧರಿಸಿ ಶಾಲೆಗೆ ಬರಲು ಮುಜುಗುರವಾಗುತ್ತಿದೆ ಎಂದು ವಿದ್ಯಾರ್ಥಿಗಳು ಅಳಲು ತೋಡಿಕೊಳ್ಳುತ್ತಿದ್ದಾರೆ. ಇದರ ಪರಿಣಾಮವಾಗಿ, ಸರ್ಕಾರ ಉಚಿತವಾಗಿ ನೀಡಿದ ಬಟ್ಟೆಯನ್ನು ಬಳಸದ ಪೋಷಕರು ಅನಿವಾರ್ಯವಾಗಿ ತಮ್ಮ ಸ್ವಂತ ಖರ್ಚಿನಲ್ಲಿ ಪ್ಯಾಂಟ್ ಹೊಲಿಸಿ ಕೊಡುತ್ತಿದ್ದು, ಪೋಷಕರಿಗೆ ಹೆಚ್ಚುವರಿ ಆರ್ಥಿಕ ಹೊರೆ ಉಂಟಾಗುತ್ತಿದೆ.
ಮೂಲೆ ಸೇರಿದ ಉಚಿತ ಬಟ್ಟೆ, ಪೋಷಕರಿಗೆ ಆರ್ಥಿಕ ಹೊರೆ
ರಾಜ್ಯ ಸರ್ಕಾರವು 1 ರಿಂದ 7ನೇ ತರಗತಿಯ ಸರ್ಕಾರಿ ಶಾಲಾ ಮಕ್ಕಳಿಗೆ ಉಚಿತ ಸಮವಸ್ತ್ರ ವಿತರಿಸುತ್ತಿದೆ. ಆದರೆ 7ನೇ ತರಗತಿಯಲ್ಲಿ ಓದುವ 12–13 ವರ್ಷದ ಬಾಲಕರಿಗೂ ಈಗಲೂ ಕೇವಲ ಶರ್ಟ್ ಹಾಗೂ ಚಡ್ಡಿ (ಹಾಫ್ ಪ್ಯಾಂಟ್) ಹೊಲಿಸಲು ಬೇಕಾಗುವಷ್ಟು ಮಾತ್ರ ಬಟ್ಟೆ ನೀಡಲಾಗುತ್ತಿದೆ. ರಾಜಧಾನಿ ಬೆಂಗಳೂರು ಸೇರಿದಂತೆ ನಗರ ಪ್ರದೇಶಗಳಲ್ಲಿನ ಬಹುತೇಕ ಖಾಸಗಿ ಶಾಲೆಗಳಲ್ಲಿ 6ನೇ ತರಗತಿಯಿಂದಲೇ ವಿದ್ಯಾರ್ಥಿಗಳು ಕಡ್ಡಾಯವಾಗಿ ಫುಲ್ ಪ್ಯಾಂಟ್ ಧರಿಸುತ್ತಾರೆ. ಆದರೆ ಸರ್ಕಾರಿ ಶಾಲೆಗಳಲ್ಲಿ ಮಾತ್ರ ಹಳೇ ಚಡ್ಡಿ ಧರಿಸುವ ವ್ಯವಸ್ಥೆಯೇ ಮುಂದುವರಿದಿದೆ. ‘ಚಡ್ಡಿ ಹಾಕಿಕೊಂಡು ಶಾಲೆಗೆ ಬರಲು ಮುಜುಗರವಾಗುತ್ತದೆ. ಆಟ ಆಡುವಾಗ ಬಿದ್ದು ಗಾಯಗಳಾಗುತ್ತವೆ ಮತ್ತು ಚಳಿಗಾಲದಲ್ಲೂ ತೊಂದರೆಯಾಗುತ್ತದೆ. ನಮಗೂ ಫುಲ್ ಪ್ಯಾಂಟ್ ಬಟ್ಟೆ ಕೊಡಬೇಕು’ ಎಂದು ವಿದ್ಯಾರ್ಥಿಗಳು ಅಳಲು ತೋಡಿಕೊಂಡಿದ್ದಾರೆ.
ಮಕ್ಕಳ ಈ ಹಠ ಮತ್ತು ಒತ್ತಾಯಕ್ಕೆ ಮಣಿಯುತ್ತಿರುವ ಪೋಷಕರು ತಮ್ಮ ಸ್ವಂತ ಹಣದಲ್ಲಿ ಸಾವಿರಾರು ರೂಪಾಯಿ ಖರ್ಚು ಮಾಡಿ ರೆಡಿಮೇಡ್ ಪ್ಯಾಂಟ್ ಅಥವಾ ಬಟ್ಟೆ ಖರೀದಿಸುತ್ತಿದ್ದಾರೆ. ‘ಮಕ್ಕಳು ಚಡ್ಡಿ ಹಾಕಲ್ಲ ಎನ್ನುತ್ತಾರೆ, ಹೀಗಾಗಿ ಸರ್ಕಾರ ಕೊಟ್ಟ ಬಟ್ಟೆ ಮನೆಯಲ್ಲೇ ಬಳಕೆಯಾಗದೆ ಉಳಿಯುತ್ತಿದೆ. ನಾವು ಬೇರೆ ಹಣ ಖರ್ಚು ಮಾಡಿ ಪ್ಯಾಂಟ್ ತರಬೇಕಾಗಿದೆ. ಸರ್ಕಾರ ಇನ್ಮುಂದೆ ಪ್ಯಾಂಟ್ ಅಳತೆಯ ಬಟ್ಟೆಯನ್ನಾದರೂ ನೀಡಿದರೆ ಪೋಷಕರಿಗೆ ಅನುಕೂಲವಾಗುತ್ತದೆ’ ಎಂದು ಪೋಷಕರು ಅಸಮಾಧಾನ ಹೊರಹಾಕಿದ್ದಾರೆ.
ಪರಿಶೀಲನೆಯ ಭರವಸೆ ನೀಡಿದ ಶಿಕ್ಷಣ ಇಲಾಖೆ ಆಯುಕ್ತರು
ವಿದ್ಯಾರ್ಥಿಗಳು ಮತ್ತು ಪೋಷಕರಿಂದ ಕೇಳಿಬರುತ್ತಿರುವ ಈ ಬೇಡಿಕೆಯ ಕುರಿತು ಶಾಲಾ ಶಿಕ್ಷಣ ಇಲಾಖೆಯ ಆಯುಕ್ತರಾದ ಸುರಳ್ಳಕರ್ ವಿಕಾಸ್ ಕಿಶೋರ್ ಅವರು ಪ್ರತಿಕ್ರಿಯಿಸಿದ್ದಾರೆ. ಈ ಸಮಸ್ಯೆಯನ್ನು ಇಲಾಖೆಯು ಸೂಕ್ಷ್ಮವಾಗಿ ಗಮನಿಸಿದ್ದು, 7ನೇ ತರಗತಿಯಿಂದಲೇ ಬಾಲಕರಿಗೆ ಪ್ಯಾಂಟ್ ಅಳತೆಯ ಸಮವಸ್ತ್ರವನ್ನು ನೀಡುವಂತೆ ಬಂದಿರುವ ಮನವಿ ಮತ್ತು ಬೇಡಿಕೆಯನ್ನು ಸರ್ಕಾರದ ಗಮನಕ್ಕೆ ತರಲಾಗುವುದು ಹಾಗೂ ಈ ವಿಷಯವನ್ನು ಆದಷ್ಟು ಬೇರೆ ಪರಿಶೀಲಿಸಲಾಗುವುದು ಎಂದು ಅವರು ಭರವಸೆ ನೀಡಿದ್ದಾರೆ.
ಒಂದೆಡೆ ಸರ್ಕಾರ ಕೋಟ್ಯಂತರ ರೂಪಾಯಿ ವೆಚ್ಚ ಮಾಡಿ ಉಚಿತ ಸಮವಸ್ತ್ರ ನೀಡುತ್ತಿದ್ದರೂ, ಅದು ಅಳತೆಯ ಸಮಸ್ಯೆಯಿಂದಾಗಿ ಸಮರ್ಪಕವಾಗಿ ಬಳಕೆಯಾಗುತ್ತಿಲ್ಲ. ಪೋಷಕರು ತಮ್ಮ ಜೇಬಿನಿಂದಲೇ ಹಣ ಖರ್ಚು ಮಾಡುತ್ತಿರುವುದರಿಂದ ಸರ್ಕಾರದ ಉದ್ದೇಶವೇ ಹಳ್ಳ ಹಿಡಿಯುತ್ತಿದೆ. ಈ ಹಿನ್ನೆಲೆಯಲ್ಲಿ 7ನೇ ತರಗತಿಯಿಂದಲೇ ಪ್ಯಾಂಟ್ ನೀಡುವ ಬೇಡಿಕೆಗೆ ಸರ್ಕಾರ ಹೇಗೆ ಸ್ಪಂದಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
