ನವದೆಹಲಿ, ಜುಲೈ 16: ಭಾರತೀಯ ಹೂಡಿಕೆ ಮಾರುಕಟ್ಟೆಯಲ್ಲಿ ಇತ್ತೀಚಿನ ದಿನಗಳಲ್ಲಿ ಸಣ್ಣ ಮೊತ್ತದ ಎಸ್ಐಪಿಗಳು (Systematic Investment Plans – SIP) ಭಾರಿ ಸಂಚಲನ ಸೃಷ್ಟಿಸುತ್ತಿವೆ. ಮ್ಯೂಚುವಲ್ ಫಂಡ್ಗಳನ್ನು ಸಾಮಾನ್ಯ ಜನರಿಗೂ ತಲುಪಿಸುವ ಉದ್ದೇಶದಿಂದ ಜಾರಿಗೆ ತರಲಾದ ‘ಚೋಟಿ ಎಸ್ಐಪಿ’ (Choti SIP) ಯೋಜನೆಗೆ ದೇಶಾದ್ಯಂತ ಭಾರಿ ಜನಪ್ರಿಯತೆ ವ್ಯಕ್ತವಾಗುತ್ತಿದೆ. ಕೇವಲ ತಿಂಗಳಿಗೆ ₹250 ಹೂಡಿಕೆ ಮಾಡುವ ಮೂಲಕ ಹೂಡಿಕೆ ಪ್ರಪಂಚಕ್ಕೆ ಕಾಲಿಡುತ್ತಿರುವವರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಆದರೆ, ಇದರ ನಡುವೆಯೇ ಮಾರುಕಟ್ಟೆ ತಜ್ಞರು ಒಂದು ಪ್ರಮುಖ ಕಳವಳಕಾರಿ ವಿಷಯವನ್ನು ಬಹಿರಂಗಪಡಿಸಿದ್ದಾರೆ. ಮೊದಲ ಬಾರಿಗೆ ಮ್ಯೂಚುವಲ್ ಫಂಡ್ಗೆ ಪ್ರವೇಶಿಸುತ್ತಿರುವ ಹೊಸ ಹೂಡಿಕೆದಾರರಲ್ಲಿ ಹೆಚ್ಚಿನವರು ಆರಂಭದ ಕೆಲವೇ ತಿಂಗಳುಗಳಲ್ಲಿ ತಮ್ಮ ಎಸ್ಐಪಿಗಳನ್ನು ನಿಲ್ಲಿಸಿ ಹೊರನಡೆಯುತ್ತಿದ್ದಾರೆ.
2025ರ ಏಪ್ರಿಲ್ನಲ್ಲಿ 1.97 ಲಕ್ಷ ಇದ್ದ ಸಿಪ್ ಅಕೌಂಟ್ಗಳು 2026ರ ಜೂನ್ನಲ್ಲಿ 3.22 ಲಕ್ಷಕ್ಕೆ ಏರಿವೆ. ಆದರೆ, ಮೇ ತಿಂಗಳಲ್ಲಿ 26,000 ಸಿಪ್ ಅಕೌಂಟ್ಗಳು ನಿಂತಿವೆ. ಕುತೂಹಲ ಎಂದರೆ, 2025ರ ಸೆಪ್ಟೆಂಬರ್ನಿಂದ ಪ್ರತೀ ತಿಂಗಳು ಸರಾಸರಿಯಾಗಿ 28,000 ಹೊಸ ಎಸ್ಐಪಿಗಳು ಆರಂಭಗೊಳ್ಳುತ್ತಿವೆ. ಆದರೆ, ಅದೇ ಅವದಿಯಲ್ಲಿ 20,000 ಅಕೌಂಟ್ಗಳು ನಿಲ್ಲುತ್ತಾ ಬಂದಿವೆ.
‘ಚೋಟಿ ಎಸ್ಐಪಿ’ ಎಂದರೇನು?
ಮ್ಯೂಚುವಲ್ ಫಂಡ್ಗಳಲ್ಲಿ ಈ ಹಿಂದೆ ಕನಿಷ್ಠ ಹೂಡಿಕೆ ಮೊತ್ತ ಸಾಮಾನ್ಯವಾಗಿ ₹500 ರಿಂದ ₹1,000 ಇರುತ್ತಿತ್ತು. ಆದರೆ ದೇಶದ ಆರ್ಥಿಕ ಒಳಗೊಳ್ಳುವಿಕೆಯನ್ನು (Financial Inclusion) ಹೆಚ್ಚಿಸಲು, ಕಡಿಮೆ ಆದಾಯ ಸ್ತರದ ಜನರನ್ನು ಮ್ಯೂಚುವಲ್ ಫಂಡ್ಗಳತ್ತ ಆಕರ್ಷಿಸಲು ಸೆಬಿ (SEBI) ಅನುಮತಿಯೊಂದಿಗೆ ಕೇವಲ ತಿಂಗಳಿಗೆ ₹250 ರಿಂದ ಹೂಡಿಕೆ ಆರಂಭಿಸುವ ‘ಚೋಟಿ ಎಸ್ಐಪಿ’ ಸೌಲಭ್ಯವನ್ನು ಮ್ಯೂಚುವಲ್ ಫಂಡ್ ಸಂಸ್ಥೆಗಳು ಪರಿಚಯಿಸಿವೆ. ಇದು ವಿದ್ಯಾರ್ಥಿಗಳು, ಗೃಹಿಣಿಯರು ಹಾಗೂ ಕಡಿಮೆ ಆದಾಯದ ಜನರನ್ನು ಗುರಿಯಾಗಿಸಿಕೊಂಡು ರೂಪಿಸಲಾಗಿದೆ.
ಇದನ್ನೂ ಓದಿ: ಇಪಿಎಫ್ಒ ಅಪ್ಡೇಟ್; ಪಿಎಫ್ ಖಾತೆಗೆ ಬರುತ್ತಿದೆ ಬಡ್ಡಿ ಹಣ; ನಿಮಗೆ ಬಂದಿದೆಯಾ, ಪರಿಶೀಲಿಸುವುದು ಹೇಗೆ?
ಹೊಸ ಹೂಡಿಕೆದಾರರು ಬೇಗನೆ ಹೊರನಡೆಯುತ್ತಿರುವುದಕ್ಕೆ ಕಾರಣಗಳೇನು?
ಮಾರುಕಟ್ಟೆಯಲ್ಲಿ ಸಣ್ಣ ಹೂಡಿಕೆದಾರರ ನೋಂದಣಿ ಹೆಚ್ಚುತ್ತಿದ್ದರೂ, ದೀರ್ಘಾವಧಿಯವರೆಗೆ ಹೂಡಿಕೆ ಮುಂದುವರಿಸಲು ಅವರು ವಿಫಲರಾಗುತ್ತಿದ್ದಾರೆ. ಇದಕ್ಕೆ ಮುಖ್ಯ ಕಾರಣಗಳು ಇಲ್ಲಿವೆ:
- ಮಾರುಕಟ್ಟೆಯ ಏರಿಳಿತದ ಭಯ: ಶೇರು ಮಾರುಕಟ್ಟೆಯ ಏರಿಳಿತಗಳ (Market Volatility) ಬಗ್ಗೆ ಹೊಸಬರಲ್ಲಿ ಸೂಕ್ತ ತಿಳುವಳಿಕೆ ಕೊರತೆ ಇರುತ್ತದೆ. ಮಾರುಕಟ್ಟೆ ಸ್ವಲ್ಪ ಇಳಿದ ತಕ್ಷಣ ತಮ್ಮ ಹೂಡಿಕೆಯ ಮೌಲ್ಯ ಕಡಿಮೆಯಾಗುವುದನ್ನು ನೋಡಿ ಹೆದರಿ ಎಸ್ಐಪಿಗಳನ್ನು ನಿಲ್ಲಿಸುತ್ತಿದ್ದಾರೆ.
- ತ್ವರಿತ ಲಾಭದ ನಿರೀಕ್ಷೆ: ಎಸ್ಐಪಿ ಅಂದರೆ ರಾತ್ರೋರಾತ್ರಿ ಹಣ ದುಪ್ಪಟ್ಟು ಮಾಡುವ ಯೋಜನೆಯಲ್ಲ. ಇದಕ್ಕೆ ದೀರ್ಘಾವಧಿಯ ತಾಳ್ಮೆ ಬೇಕು. ಆದರೆ ಶೀಘ್ರ ಲಾಭ ಸಿಗದಿದ್ದಾಗ ಜನರು ನಿರಾಶರಾಗುತ್ತಿದ್ದಾರೆ.
- ಬ್ಯಾಂಕ್ ಖಾತೆಯಲ್ಲಿ ಬ್ಯಾಲೆನ್ಸ್ ಕೊರತೆ: ಪ್ರತಿ ತಿಂಗಳು ಆಟೋ-ಡೆಬಿಟ್ ಆಗುವ ದಿನ ಖಾತೆಯಲ್ಲಿ ಕನಿಷ್ಠ ಹಣ ಇಲ್ಲದಿದ್ದರೆ ಬ್ಯಾಂಕ್ಗಳು ಗ್ರಾಹಕರಿಗೆ ದಂಡ (ECS Bounce Charges) ವಿಧಿಸುತ್ತವೆ. ₹250 ಎಸ್ಐಪಿ ಕಂತು ಕಟ್ಟಲು ವಿಫಲವಾಗಿ ಬ್ಯಾಂಕ್ನಿಂದ ₹200-₹300 ದಂಡ ಬೀಳುವುದರಿಂದ ಬೇಸತ್ತು ಅನೇಕರು ಎಸ್ಐಪಿ ಅನ್ನೇ ರದ್ದುಗೊಳಿಸುತ್ತಿದ್ದಾರೆ.
- ಹಣಕಾಸು ಶಿಸ್ತಿನ ಕೊರತೆ: ಸಣ್ಣ ಹೂಡಿಕೆಯನ್ನು ಗಂಭೀರವಾಗಿ ಪರಿಗಣಿಸದೆ, ಇತರ ಖರ್ಚುಗಳಿಗೆ ಆದ್ಯತೆ ನೀಡಿ ಹೂಡಿಕೆಯನ್ನು ಅರ್ಧಕ್ಕೆ ನಿಲ್ಲಿಸುವುದು ಮತ್ತೊಂದು ಪ್ರಮುಖ ಕಾರಣವಾಗಿದೆ.
ಇದನ್ನೂ ಓದಿ: ಐಟಿ ರಿಟರ್ನ್ಸ್ ಸಲ್ಲಿಸಲು ಜುಲೈ 31 ಕೊನೆಯ ದಿನ; ಡೆಡ್ಲೈನ್ ಮಿಸ್ ಆದರೆ ಏನೆಲ್ಲಾ ದಂಡ, ಶುಲ್ಕಗಳಿವೆ ಗೊತ್ತಾ?
ತಜ್ಞರ ಕಿವಿಮಾತು: ಹನಿ ಹನಿ ಸೇರಿದರೆ ಹಳ್ಳ
ಬರೀ ₹250 ಹೂಡಿಕೆಯಿಂದ ಏನು ಮಾಡಲು ಸಾಧ್ಯ ಎಂದು ಕಡೆಗಣಿಸಬೇಡಿ. ತಿಂಗಳಿಗೆ ₹250 ರಂತೆ ವರ್ಷಕ್ಕೆ ಶೇ.12 ರಷ್ಟು ಸರಾಸರಿ ಆದಾಯ ನಿರೀಕ್ಷಿಸಿದರೆ, ದೀರ್ಘಾವಧಿಯಲ್ಲಿ ಅದು ಪಡೆಯುವ ಕಾಂಪೌಂಡಿಂಗ್ (ಚಕ್ರಬಡ್ಡಿ) ಶಕ್ತಿ ಅಪಾರ. ಕೇವಲ ₹250 ಎಸ್ಐಪಿಯಲ್ಲಿ ದೀರ್ಘಾವಧಿಯಲ್ಲಿ ₹10 ಲಕ್ಷ ಪಡೆಯಲು ಸಾಧ್ಯ. ಶೇ. 12 ವಾರ್ಷಿಕ ದರದಲ್ಲಿ ಫಂಡ್ ಬೆಳೆದರೆ, ₹250 ಎಸ್ಐಪಿ ಈ ಕೆಳಗಿನಂತೆ ರಿಟರ್ನ್ಸ್ ಕೊಡಬಲ್ಲುದು:
- 10 ವರ್ಷದಲ್ಲಿ ಒಟ್ಟು ಹೂಡಿಕೆ ₹30,000 – ಅಂದಾಜು ಮೌಲ್ಯ ₹57,000
- 20 ವರ್ಷದಲ್ಲಿ ಒಟ್ಟು ಹೂಡಿಕೆ ₹60,000 – ಅಂದಾಜು ಮೌಲ್ಯ ₹2.5 ಲಕ್ಷ
- 30 ವರ್ಷದಲ್ಲಿ ಒಟ್ಟು ಹೂಡಿಕೆ ₹90,000 – ಅಂದಾಜು ಮೌಲ್ಯ ₹9.0 ಲಕ್ಷ
ಹಣಕಾಸಿನ ಸ್ಥಿರತೆಗಾಗಿ ಸಣ್ಣ ಮೊತ್ತದಲ್ಲೇ ಹೂಡಿಕೆ ಆರಂಭಿಸಿ, ಮಾರುಕಟ್ಟೆಯ ಏರಿಳಿತಗಳಿಗೆ ಹೆದರದೆ ದೀರ್ಘಕಾಲದವರೆಗೆ ಹೂಡಿಕೆಯನ್ನು ಮುಂದುವರಿಸುವುದು ಅತ್ಯಂತ ಅಗತ್ಯವಾಗಿದೆ. ಕಳೆದ ಒಂದು ವರ್ಷದಲ್ಲಿ ಷೇರು ಮಾರುಕಟ್ಟೆ ಹೆಚ್ಚೇನೂ ಏರಿಲ್ಲ. ಫಿಕ್ಸೆಡ್ ಡೆಪಾಸಿಟ್ಗಿಂತಲೂ ಕಡಿಮೆ ರಿಟರ್ನ್ಸ್ ಕೊಟ್ಟಿದೆ. ಈ ವೇಳೆ, ಮಾರುಕಟ್ಟೆ ಚಲನೆಗಳ ಅರಿವಿಲ್ಲದ ಹೊಸ ಹೂಡಿಕೆದಾರರಿಗೆ ಈ ರಿಟರ್ನ್ಸ್ ನಿರಾಸೆ ಎನಿಸಬಹುದು. ಆದರೆ, ಈ ರೀತಿಯ ಬೀಳುಗಳು ಷೇರು ಮಾರುಕಟ್ಟೆಯಲ್ಲಿ ಆಗಾಗ್ಗೆ ಆಗುತ್ತಿರುತ್ತದೆ. ದೀರ್ಘಾವಧಿಯಲ್ಲಿ ಮಾರುಕಟ್ಟೆ ಗಣನೀಯ ಬೆಳವಣಿಗೆ ತೋರುತ್ತದೆ. ಹೀಗಾಗಿ, ತಾಳ್ಮೆಗೆಡದೆ ಹೂಡಿಕೆ ಮುಂದುವರಿಸುವುದು ಜಾಣತನ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
