ಫಿಫಾ ವಿಶ್ವಕಪ್ನ ಮೂರನೇ ಸ್ಥಾನಕ್ಕಾಗಿ ನಡೆದ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡವು ಫ್ರಾನ್ಸ್ ವಿರುದ್ಧ 6-4 ಗೋಲುಗಳ ಅಂತರದಿಂದ ಐತಿಹಾಸಿಕ ಜಯ ಸಾಧಿಸಿದೆ. ಮಿಯಾಮಿ ಸ್ಟೇಡಿಯಂನಲ್ಲಿ ಶನಿವಾರ (ಜುಲೈ 18, 2026) ನಡೆದ ಈ ಪಂದ್ಯವು ಇತ್ತೀಚಿನ ದಶಕಗಳಲ್ಲೇ ಅತ್ಯಂತ ರೋಮಾಂಚಕ ಮತ್ತು ಅತಿ ಹೆಚ್ಚು ಗೋಲುಗಳು ದಾಖಲಾದ ಪಂದ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಇಂಗ್ಲೆಂಡ್ ಮಿಂಚಿನಾಟ:
ಥಾಮಸ್ ಟುಚೆಲ್ ಅವರ ಮಾರ್ಗದರ್ಶನದಲ್ಲಿ ಕಣಕ್ಕಿಳಿದ ಇಂಗ್ಲೆಂಡ್ ಪಂದ್ಯದ ಮೊದಲಾರ್ಧದಲ್ಲೇ 4-0 ಮುನ್ನಡೆ ಸಾಧಿಸಿತು. ಬುಕಾಯೊ ಸಾಕಾ ಅವರ ಭರ್ಜರಿ ಎರಡು ಗೋಲುಗಳು, ಡೆಕ್ಲಾನ್ ರೈಸ್ ಮತ್ತು ಎಜ್ರಿ ಕೋನ್ಸಾ ಅವರ ತಲಾ ಒಂದು ಗೋಲು ಇಂಗ್ಲೆಂಡ್ಗೆ ಬೃಹತ್ ಮುನ್ನಡೆ ತಂದುಕೊಟ್ಟವು.
ಫ್ರಾನ್ಸ್ ಅಧ್ಬುತ ಕಂಬ್ಯಾಕ್:
ದ್ವಿತೀಯಾರ್ಧದಲ್ಲಿ ಫ್ರಾನ್ಸ್ ಕೋಚ್ ಡಿಡಿಯರ್ ಡೆಶಾಂಪ್ಸ್ ನಾಲ್ಕು ಮಹತ್ವದ ಆಟಗಾರರ ಬದಲಾವಣೆ ಮಾಡಿದರು. ಇದು ಪಂದ್ಯದ ಚಿತ್ರಣವನ್ನೇ ಬದಲಿಸಿತು. ಫ್ರಾನ್ಸ್ ಪರ ಕಿಲಿಯನ್ ಎಂಬಾಪೆ ಎರಡು ಗೋಲು ಬಾರಿಸಿದರು. ಇದರ ನಡುವೆ ಇಂಗ್ಲೆಂಡ್ ಆಟಗಾರ ಬ್ರಾಡ್ಲಿ ಬಾರ್ಕೋಲಾ ಸೆಲ್ಫ್ ಗೋಲು ದಾಖಲಾಯಿತು. ಪರಿಣಾಮ ಉಭಯ ತಂಡಗಳ ಅಂತರ 4-3 ಕ್ಕೆ ಬಂದು ನಿಂತಿತು.
ಸಾಕಾ ಹ್ಯಾಟ್ರಿಕ್: ಜೂಡ್ ಗೆಲುವಿನ ಗೋಲು!
ಪಂದ್ಯದ 86ನೇ ನಿಮಿಷದಲ್ಲಿ ಬುಕಾಯೊ ಸಾಕಾ ಪೆನಾಲ್ಟಿಯನ್ನು ಗೋಲಾಗಿ ಪರಿವರ್ತಿಸಿ ತಮ್ಮ ಹ್ಯಾಟ್ರಿಕ್ ಪೂರ್ಣಗೊಳಿಸಿದರು. ಆ ಮೂಲಕ ವಿಶ್ವಕಪ್ನಲ್ಲಿ ಹ್ಯಾಟ್ರಿಕ್ ಗಳಿಸಿದ ನಾಲ್ಕನೇ ಇಂಗ್ಲೆಂಡ್ ಆಟಗಾರ ಎನಿಸಿಕೊಂಡರು.
ಕೊನೆಯ ಕ್ಷಣದಲ್ಲಿ ಫ್ರಾನ್ಸ್ನ ಉಸ್ಮಾನೆ ಡೆಂಬೆಲೆ ಮತ್ತೊಂದು ಗೋಲು ಹೊಡೆದರೂ, ಜೂಡ್ ಬೆಲ್ಲಿಂಗ್ಹ್ಯಾಮ್ ಇಂಜುರಿ ಟೈಮ್ನಲ್ಲಿ ಅದ್ಭುತ ಸೋಲೋ ರನ್ ಮೂಲಕ ಗೋಲು ಬಾರಿಸಿ 6-4 ಗೋಲುಗಳ ಅಂತರದಿಂದ ಇಂಗ್ಲೆಂಡ್ ತಂಡದ ಗೆಲುವನ್ನು ಖಚಿತಪಡಿಸಿದರು.
ಹೊಸ ದಾಖಲೆಗಳು ನಿರ್ಣಾಣ:
- ಕಿಲಿಯನ್ ಎಂಬಾಪೆ ಆಲ್-ಟೈಮ್ ರೆಕಾರ್ಡ್: ಫ್ರಾನ್ಸ್ ಸೋತರೂ, ನಾಯಕ ಕಿಲಿಯನ್ ಎಂಬಾಪೆ ಎರಡು ಭರ್ಜರಿ ಗೋಲು ಗಳಿಸುವ ಮೂಲಕ ಲಿಯೋನೆಲ್ ಮೆಸ್ಸಿ ಅವರ ದಾಖಲೆಯನ್ನು ಮುರಿದರು. ಎಂಬಾಪೆ ಈಗ ವಿಶ್ವಕಪ್ ಇತಿಹಾಸದಲ್ಲೇ ಅತಿ ಹೆಚ್ಚು ಗೋಲು (22 ಗೋಲುಗಳು) ಗಳಿಸಿದ ದಾಖಲೆ ಬರೆದಿದ್ದಾರೆ.
- ಮೈಕೇಲ್ ಒಲಿಸೆ ಹೊಸ ದಾಖಲೆ: ಎಂಬಾಪೆ ಅವರ ಎರಡು ಗೋಲುಗಳಿಗೆ ಅಸಿಸ್ಟ್ ಮಾಡಿದ ಮೈಕೇಲ್ ಒಲಿಸೆ, ಈ ವಿಶ್ವಕಪ್ನಲ್ಲಿ ಒಟ್ಟು 7 ಅಸಿಸ್ಟ್ಗಳನ್ನು ಮಾಡಿದಂತಾಗಿದೆ. ಈ ಮೂಲಕ 1970ರಲ್ಲಿ ಪೀಲೆ ಬರೆದಿದ್ದ “ಒಂದೇ ವಿಶ್ವಕಪ್ನಲ್ಲಿ ಅತಿ ಹೆಚ್ಚು ಅಸಿಸ್ಟ್” ಮಾಡಿದ ದಾಖಲೆಯನ್ನು ಅವರು ಮುರಿದರು.
ಇದನ್ನೂ ಓದಿ: ಫಿಫಾ ವಿಶ್ವಕಪ್ ಫೈನಲ್ ಪಂದ್ಯದ ಟಿಕೆಟ್ ದರ ಕೇಳಿದ್ರೆ ದಂಗಾಗುವುದು ಗ್ಯಾರೆಂಟಿ!
ಈ ಗೆಲುವಿನೊಂದಿಗೆ ಇಂಗ್ಲೆಂಡ್ ತಂಡವು ವಿದೇಶಿ ನೆಲದಲ್ಲಿ ತನ್ನ ಅತ್ಯುತ್ತಮ ವಿಶ್ವಕಪ್ ಪ್ರದರ್ಶನವನ್ನು ದಾಖಲಿಸಿ ಕಂಚಿನ ಪದಕಕ್ಕೆ ಮುತ್ತಿಕ್ಕಿದೆ. ಫ್ರಾನ್ಸ್ ಕೋಚ್ ಆಗಿ ಡಿಡಿಯರ್ ಡೆಶಾಂಪ್ಸ್ ಅವರ ಸುದೀರ್ಘ ಪಯಣ ಈ ಪಂದ್ಯದೊಂದಿಗೆ ಕೊನೆಗೊಂಡಿದೆ. ಅಲ್ಲದೆ ಫ್ರಾನ್ಸ್ ಪಡೆಯ ಮುಂದಿನ ಕೋಚ್ ಆಗಿ ಮಾಜಿ ಆಟಗಾರ ಝಿನೆದಿನ್ ಝಿದಾನ್ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.
Published On – 7:42 am, Sun, 19 July 26
