ಮಿಕ್ಸರ್ ಗ್ರೈಂಡರ್ (mixer grinder) ಅಡುಗೆ ಮನೆಯಲ್ಲಿರುವ ಅಗತ್ಯ ವಸ್ತುವಾಗಿದ್ದು, ಇದು ಚಟ್ನಿ ತಯಾರಿಸುವುದು, ಮಸಾಲೆಗಳನ್ನು ರುಬ್ಬುವುದು, ಜ್ಯೂಸ್ ತಯಾರಿಸುವುದು ಹೀಗೆ ಪ್ರತಿಯೊಂದು ಅಡುಗೆ ಕೆಲಸಗಳನ್ನು ಥಟ್ಟನೆ ಪೂರ್ಣಗೊಳಿಸಲು ಸಹಾಯ ಮಾಡುತ್ತದೆ. ಹಾಗಾಗಿ ಹೆಚ್ಚಿನವರು ಗಟ್ಟಿ ಮಸಾಲೆ, ಐಸ್, ಹುರಿದಿಟ್ಟ ಬಿಸಿಬಿಸಿ ಮಸಾಲೆ ಎಲ್ಲವನ್ನೂ ಮಿಕ್ಸಿಯಲ್ಲೇ ರುಬ್ಬುತ್ತಾರೆ. ಆದರೆ ಹೀಗೆ ಎಲ್ಲಾ ಪದಾರ್ಥಗಳನ್ನು ಮಿಕ್ಸಿಯಲ್ಲಿ ರುಬ್ಬಬಾರದು. ವಿಶೇಷವಾಗಿ ಈ ಕೆಲವೊಂದು ವಸ್ತುಗಳನ್ನು ಮಿಕ್ಸರ್ ಗ್ರೈಂಡರ್ನಲ್ಲಿ ಗ್ರೈಂಡ್ ಮಾಡುವುದರಿಂದ ಮಿಕ್ಸಿಯ ಮೋಟಾರ್ ಮತ್ತು ಜಾರ್ನ ಬ್ಲೇಡ್ ಹಾನಿಗೊಳಲಾಗುತ್ತದೆ. ಹಾಗಾಗಿ ಮಿಕ್ಸಿ ದೀರ್ಘ ಕಾಲ ಬಾಳಿಕೆ ಬರಬೇಕೆಂದಿದ್ದರೆ, ಈ ವಸ್ತುಗಳನ್ನು ಮಿಕ್ಸಿಯಲ್ಲಿ ಗ್ರೈಂಡ್ ಮಾಡಬೇಡಿ.
ಮಿಕ್ಸಿಯಲ್ಲಿ ಯಾವೆಲ್ಲಾ ವಸ್ತುಗಳನ್ನು ರುಬ್ಬಬಾರದು?
ಬಿಸಿ ಆಹಾರ ಪದಾರ್ಥಗಳು: ಹುರಿದಿಟ್ಟ ಬಿಸಿ ಮಸಾಲೆಗಳು, ಸೂಪ್ ತಯಾರಿಸಲು ಬೇಯಿಸಿದ ತರಕಾರಿಗಳು ಇವೆಲ್ಲವನ್ನೂ ಬಿಸಿ ಇರುವಾಗಲೇ ಮಿಕ್ಸಿಯಲ್ಲಿ ರುಬ್ಬಬಾರದು. ಏಕೆಂದರೆ ಈ ಬಿಸಿ ಪದಾರ್ಥಗಳು ಜಾರ್ ಒಳಗೆ ಒತ್ತಡವನ್ನು ಉಂಟುಮಾಡುತ್ತದೆ. ಇದು ಮುಚ್ಚಳ ಒಮ್ಮೆಲೆ ತೆರೆಯಲು ಕಾರಣವಾಗಬಹುದು. ಅಲ್ಲದೆ ಪದೇ ಪದೇ ಬಿಸಿ ಪದಾರ್ಥಗಳನ್ನು ರುಬ್ಬುವುದರಿಂದ ಮಿಕ್ಸರ್ ಜಾರ್ ಮತ್ತು ಮೋಟಾರ್ ಎರಡರ ಮೇಲೂ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಆದ್ದರಿಂದ ಬಿಸಿ ಮಾಡಿದ ಪದಾರ್ಥಗಳು ತಣ್ಣಗಅದ ಬಳಿಕವೇ ಅವುಗಳನ್ನು ಮಿಕ್ಸಿಯಲ್ಲಿ ರುಬ್ಬಿ.
ಐಸ್ಕ್ಯೂಬ್: ಜ್ಯೂಸ್ ಮಾಡುವ ಸಂದರ್ಭದಲ್ಲಿ ಐಸ್ಕ್ಯೂಬ್ಗಳನ್ನು ಸೇರಿಸಿ ಮಿಕ್ಸಿಯಲ್ಲಿ ರುಬ್ಬುತ್ತಾರೆ. ಹೀಗೆ ಅತಿಯಾಗಿ ಐಸ್ಕ್ಯೂಬ್ ಹಾಕುವುದರಿಂದ ಇದು ಬ್ಲೇಡ್ಗಳ ಮೇಲೆ ಹಠಾತ್ ಒತ್ತಡವನ್ನುಂಟು ಮಾಡುತ್ತದೆ, ಇದು ಬ್ಲೇಡ್ಗಳಿಗೆ ಹಾನಿ ಉಂಟುಮಾಡುವುದಲ್ಲದೆ, ಮೋಟಾರ್ ಮೇಲೆಯೂ ಒತ್ತಡವನ್ನು ಉಂಟುಮಾಡುತ್ತದೆ.
ಗಟ್ಟಿ ಮಸಾಲೆಗಳು: ಇತ್ತೀಚಿನ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಕಲಬೆರಕೆ ಮಸಾಲೆಪುಡಿಗಳು ಇರುತ್ತವೆ ಎಂದು ಮೆಣಸಿನ ಪುಡಿ, ಅರಶಿನ ಪುಡಿ ಇವೆಲ್ಲವನ್ನೂ ಮನೆಯಲ್ಲಿಯೇ ತಯಾರಿಸಿಕೊಳ್ಳುತ್ತಾರೆ. ಆದರೆ ಗಟ್ಟಿ ಮಸಾಲೆಗಳನ್ನು ಮಿಕ್ಸಿಯಲ್ಲಿ ಪುಡಿ ಮಾಡಬಾರದು. ಹೌದು ಅರಶಿನ ಕೊಂಬು, ಜಾಯಿಕಾಯಿ, ದಾಲ್ಚಿನ್ನಿಯಂತಹ ಗಟ್ಟಿ ಮಸಾಲೆಗಳನ್ನು ರುಬ್ಬುವುರಿಂದ ಜಾರ್ ಬ್ಲೇಡ್ ಹಾನಿಗೊಳಗಾಗಬಹುದು. ಒಂದೇ ಬಾರಿಗೆ ದೊಡ್ಡ ಪ್ರಮಾಣದಲ್ಲಿ ಇವುಗಳನ್ನು ರುಬ್ಬುವುದರಿಂದ ಮೋಟಾರ್ ಮೇಲೂ ಒತ್ತಡ ಬೀಳಬಹುದು.
ಇದನ್ನೂ ಓದಿ: ಮಳೆಗಾಲದಲ್ಲಿ ಈ ತರಕಾರಿಗಳನ್ನು ತಿನ್ನುವುದನ್ನು ಆದಷ್ಟು ತಪ್ಪಿಸಿ
ಚಪಾತಿ ಹಿಟ್ಟು: ಅನೇಕ ಜನರು ಸಮಯವನ್ನು ಉಳಿಸಲು ಮತ್ತು ಕೈಗಳು ಕೊಳೆಯುವುದನ್ನು ತಪ್ಪಿಸಲು ಚಪಾತಿ ಹಿಟ್ಟನ್ನು ಮಿಕ್ಸಿಯಲ್ಲಿ ರುಬ್ಬುತ್ತಾರೆ. ಈ ದಪ್ಪ ಹಿಟ್ಟು ಬ್ಲೇಡ್ಗೆ ಅಂಟಿಕೊಂಡು, ಬ್ಲೇಡ್ಗೆ ಹಾನಿ ಉಂಟುಮಾಡುವ ಸಾಧ್ಯತೆ ಇರುತ್ತದೆ.
ಒಣ ಪದಾರ್ಥಗಳು: ಬಾದಾಮಿ, ಗೋಡಂಬಿ ಅಥವಾ ಇತರ ಒಣ ಹಣ್ಣುಗಳನ್ನು ನೀರಿಲ್ಲದೆ ದೊಡ್ಡ ಪ್ರಮಾಣದಲ್ಲಿ ರುಬ್ಬುವುದರಿಂದ ಮೋಟಾರ್ ಮೇಲೆ ಹೆಚ್ಚುವರಿ ಒತ್ತಡವನ್ನುಂಟು ಮಾಡುತ್ತದೆ. ಇದಲ್ಲದೆ ಅಕ್ಕಿ, ಗೋಧಿ, ರಾಗಿ ಮುಂತಾದ ಧಾನ್ಯಗಳನ್ನು ಒಂದೇ ಬಾರಿಗೆ ಹೆಚ್ಚಿನ ಪ್ರಮಾಣದಲ್ಲಿ ಸೇರಿಸುವುದರಿಂದ ಯಂತ್ರದ ಮೇಲೆ ಹೆಚ್ಚಿನ ಒತ್ತಡ ಬೀಳುತ್ತದೆ. ಇದು ಮಿಕ್ಸರ್ ಗ್ರೈಂಡರ್ನ ಮೋಟಾರ್ ಬೇಗನೆ ಹಾಳಾಗಲು ಕಾರಣವಾಗಬಹುದು.
ಇದಲ್ಲದೆ ಮಿಕ್ಸರ್ ಜಾರ್ಗಳನ್ನು ಓವರ್ಲೋಡ್ ಮಾಡಬಾರದು. ಇದು ಹೆಚ್ಚಿನವರು ಮಾಡುವ ಸಾಮಾನ್ಯ ತಪ್ಪಾಗಿದೆ. ಹೀಗೆ ಮಾಡುವುದರಿಂದ ಮಿಕ್ಸಿಯ ಕಾರ್ಯಕ್ಷಮತೆ ದುರ್ಬಲಗೊಳ್ಳುತ್ತದೆ ಮತ್ತು ಮೋಟಾರ್, ಬ್ಲೇಡ್ ಹಾನಿಗೊಳಗಾಗುತ್ತದೆ.
ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
