ಸಂಬಳ ಇತ್ಯಾದಿ ನಿಯಮಿತ ಸಂಪಾದನೆ ಹೊಂದಿರುವ ಜನರಿಗೆ ಎಸ್ಐಪಿ (SIP- Systematic Investment Plan) ಮೂಲಕ ಹೂಡಿಕೆ ಮಾಡುವುದು ಬಹಳ ಪ್ರಯೋಜನಕಾರಿ. ನಿಯಮಿತವಾಗಿ ಹೂಡಿಕೆ ಮಾಡುತ್ತಾ ಹೋದಾಗ ದೀರ್ಘಾವಧಿಯಲ್ಲಿ ಅಚ್ಚರಿ ಎನಿಸುವಷ್ಟು ದೊಡ್ಡ ಮೊತ್ತವಾಗಿ ಬೆಳೆದಿರುತ್ತದೆ. ಸಿಸ್ಟಮ್ಯಾಟಿಕ್ ಇನ್ವೆಸ್ಟ್ಮೆಂಟ್ ಪ್ಲಾನ್ಗಳಿಂದ ಇದು ಸಾಧ್ಯ. ಎಸ್ಐಪಿಗಳು ಎಲ್ಲಾ ಅಗತ್ಯಗಳಿಗೂ ಹೊಂದಿಕೆಯಾಗುವ ಹೂಡಿಕೆ ಯೋಜನೆಗಳಾಗಿವೆ. ಎಸ್ಐಪಿ ಜೊತೆಗೆ ಸ್ಟೆಪ್ ತಂತ್ರ ಅನುಸರಿಸಿದರೆ ಪ್ರಯೋಜನ ಇನ್ನೂ ಹೆಚ್ಚಿನದ್ದಾಗಿರುತ್ತದೆ.
ಚಾರ್ಟರ್ಡ್ ಅಕೌಂಟೆಂಟ್ ಆಗಿರುವ ನಿತಿನ್ ಕೌಶಿಕ್ ಅವರು ಎಸ್ಐಪಿ ಹಾಗೂ ವಾರ್ಷಿಕ ಸ್ಟೆಪಪ್ ತಂತ್ರ ಮಾಡುವ ಮ್ಯಾಜಿಕ್ ಅನ್ನು ತೋರಿಸಿ, ಎಕ್ಸ್ ಪೋಸ್ಟ್ ಹಾಕಿದ್ದಾರೆ. ‘ಸಣ್ಣ ಮೊತ್ತದ ಎಸ್ಐಪಿ ಇದ್ದರೆ ವಾರ್ಷಿಕ ಶೇ. 10 ಸ್ಟೆಪಪ್ ಏಕೈಕ ಪರಿಹಾರ ಎನಿಸುತ್ತದೆ’ ಎಂದು ತಿಳಿಸಿರುವ ಕೌಶಿಕ್ ಅವರು ಒಂದು ಉದಾಹರಣೆ ಕೂಡ ಕೊಟ್ಟಿದ್ದಾರೆ.
ಇದನ್ನೂ ಓದಿ: ವಾಲಂಟರಿ ಪ್ರಾವಿಡೆಂಟ್ ಫಂಡ್; ನಿಮ್ಮ ಇಪಿಎಫ್ ಕಾರ್ಪಸ್ ಹೆಚ್ಚಿಸುವ ಒಂದು ಪ್ಲಾನ್
25ರ ವಯಸ್ಸಿನಲ್ಲಿ ನೀವು 2,000 ರೂಗಳ ಮಾಸಿಕ ಎಸ್ಐಪಿ ಹೂಡಿಕೆ ಆರಂಭಿಸುತ್ತೀರಿ. ಹೀಗೆ 55 ವರ್ಷ ವಯಸ್ಸಿನವರೆಗೆ, ಪ್ರತೀ ತಿಂಗಳು ಹೂಡಿಕೆ ಮಾಡಿದಾಗ, ಮತ್ತು ಆ ಫಂಡ್ನಿಂದ ಶೇ. 12ರಷ್ಟು ರಿಟರ್ನ್ ಬಂದರೆ 2,000 ರೂಗಳ ಮಾಸಿಕ ಎಸ್ಐಪಿಯ ಮೌಲ್ಯ 70.6 ಲಕ್ಷ ರೂ ಆಗುತ್ತದೆ. ಶೇ. 6ರ ಹಣದುಬ್ಬರ ಪರಿಗಣಿಸಿ, 30 ವರ್ಷಗಳ ನಂತರ ಈ 70 ಲಕ್ಷ ರೂನ ನಿಜಮೌಲ್ಯ ಇವತ್ತಿನ 12.3 ಲಕ್ಷ ರೂಗೆ ಸಮವಾಗಿರುತ್ತದೆ ಎನ್ನುವುದು ಕೌಶಿಕ್ ಅವರ ವಾದ.
ಮ್ಯಾಜಿಕ್ನಂತೆ ಕೆಲಸ ಮಾಡುತ್ತೆ ಸ್ಟೆಪಪ್ ಎಸ್ಐಪಿ
ಎಸ್ಐಪಿ ಹೂಡಿಕೆಯಲ್ಲಿ ಸ್ಟೆಪಪ್ ವಿಧಾನ ಜನಪ್ರಿಯವಾಗಿದೆ. ಸ್ಟೆಪಪ್ ಎಂದರೆ ಹೂಡಿಕೆ ಹೆಚ್ಚಿಸುವುದು. ಸಂಬಳದವರಾಗಿದ್ದರೆ ವರ್ಷ ವರ್ಷ ವೇತನ ಏರಿಕೆ ಆಗುವ ಅವಕಾಶ ಇರುತ್ತದೆ. ಹೀಗೆ ಆದಾಯ ಹೆಚ್ಚಿದಾಗ ಹೂಡಿಕೆಯನ್ನೂ ಹೆಚ್ಚಿಸುವುದು ಉತ್ತಮ. ಅದೇ ಸ್ಟೆಪಪ್.
ನಿಮ್ಮ ಮಾಸಿಕ 2,000 ರೂ ಎಸ್ಐಪಿಗೆ ಪ್ರತೀ ವರ್ಷ ಶೇ. 10ರಷ್ಟು ಹೂಡಿಕೆ ಹೆಚ್ಚಿಸುತ್ತಾ ಹೋಗಿ. 30 ವರ್ಷದಲ್ಲಿ ನಿಮ್ಮದು 2.17 ಕೋಟಿ ರೂ ಕಾರ್ಪಸ್ ಆಗಿರುತ್ತದೆ. ಅದೂ ಕೇವಲ 2,000 ರೂ ಮಾಸಿಕ ಹೂಡಿಕೆಯಿಂದಲೇ.
ಇದನ್ನೂ ಓದಿ: ಪಿಪಿಎಫ್ನಲ್ಲಿ ಒಂದು ಕೋಟಿ ರೂ ಹಣ ಪಡೆಯುವುದು ಹೇಗೆ? 61,000 ರೂ ಮಾಸಿಕ ಆದಾಯ ಪಡೆಯಲು ಹೀಗೆ ಮಾಡಿ
ಮಾಸಿಕ 10,000 ರೂ ಎಸ್ಐಪಿ, 25 ವರ್ಷ ಸ್ಟೆಪಪ್ನೊಂದಿಗೆ…
ಒಂದು ವೇಳೆ ನೀವು ತಿಂಗಳಿಗೆ 10,000 ರೂ ಹೂಡಿಕೆ ಮಾಡಬಲ್ಲಿರಾದರೆ, ಮತ್ತು ಪ್ರತೀ ವರ್ಷ ಶೇ. 10ರಷ್ಟು ಹೂಡಿಕೆ ಹೆಚ್ಚಿಸಬಲ್ಲಿರಾದರೆ, 25 ವರ್ಷದಲ್ಲಿ ನಿಮ್ಮ ಹೂಡಿಕೆ ಹೆಚ್ಚೂಕಡಿಮೆ 4 ಕೋಟಿ ರೂ ಮೊತ್ತ ನಿಮ್ಮೊಂದಿಗೆ ಇರುತ್ತದೆ. ಇದೇ ರೀತಿ ಹೂಡಿಕೆಯನ್ನು ಇನ್ನೂ ಐದು ವರ್ಷ ಮುಂದುವರಿಸಿಬಿಟ್ಟರೆ ನಿಮ್ಮ ಕಾರ್ಪಸ್ ಬರೋಬ್ಬರಿ 8 ಕೋಟಿ ರೂ ಆಗುತ್ತದೆ. ಇವೆಲ್ಲಾ ಎಣಿಕೆಗಳು ನಿಜವಾಗಬೇಕಾದರೆ ನೀವು ಹೂಡಿಕೆ ಮಾಡಿರುವ ಫಂಡ್ ವಾರ್ಷಿಕ ಶೇ. 12ರ ವೇಗದಲ್ಲಿ ಗಳಿಕೆ ಮಾಡಬೇಕು.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ