ಸಾಮಾಜಿಕ ಜಾಲತಾಣ ಇನ್ಸ್ಟಾಗ್ರಾಮ್ನಲ್ಲಿ ‘ರೀಲ್ಸ್’ ಮಾಡುವ ಕ್ರೇಜ್ ಜನಸಾಮಾನ್ಯರಿಂದ ಹಿಡಿದು ಸೆಲೆಬ್ರಿಟಿಗಳವರೆಗೆ ಯಾರನ್ನೂ ಬಿಟ್ಟಿಲ್ಲ. ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಸೋಷಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ಶ್ರೀ ಫೈಜು ‘ಮೇರೆ ಮೆಹಬೂಬ್ ಕಯಾಮತ್ ಹೋಗಿ’ ಹಾಡಿಗೆ ಮಾಡಿದ ರೀಲ್ ವಿಪರೀತ ವೈರಲ್ ಆಗಿತ್ತು. ಈ ಒಂದೇ ವಿಡಿಯೊ ಫೈಜು ಅವರನ್ನು ರಾತ್ರೋರಾತ್ರಿ ಸ್ಟಾರ್ ಆಗಿ ಮಾಡಿತು. ಅಲ್ಲಿಂದ ಶುರುವಾದ ಈ ಟ್ರೆಂಡ್ ನಂತರ ನೀಟ್ ಪರೀಕ್ಷೆಯ ಕುರಿತು ಜೆನ್-ಜೀ ಯುವಜನತೆ ನಡೆಸಿದ ಪ್ರತಿಭಟನೆಯ ವೇಳೆಯೂ ಮರುಜೀವ ಪಡೆದುಕೊಂಡಿತ್ತು. ಹಲವು ಇನ್ಫ್ಲುಯೆನ್ಸರ್ಗಳು ಈ ಹಾಡನ್ನು ಬಳಸಿ ರೀಲ್ಸ್ ಮಾಡಿ ಟ್ರೆಂಡಿಂಗ್ ಸೃಷ್ಟಿಸಿದ್ದರು.
ಈಗ ಈ ಪ್ರಸಿದ್ಧ ಟ್ರೆಂಡ್ಗೆ ಹಿರಿಯ ನಟ ಅನುಪಮ್ ಖೇರ್ ಕೂಡ ಸಾಥ್ ನೀಡಿದ್ದಾರೆ. ತಮ್ಮ ಮುಂಬರುವ ‘ಖೋಸ್ಲಾ ಕಾ ಘೋಸ್ಲಾ 2’ ಚಿತ್ರದ ಸಹನಟರಾದ ಬೋಮನ್ ಇರಾನಿ, ರಣವೀರ್ ಶೋರೆ ಮತ್ತು ಪರ್ವೀನ್ ದಬಾಸ್ ಅವರೊಂದಿಗೆ ಸೇರಿ ಅವರು ‘ಮೇರೆ ಮೆಹಬೂಬ್ ಕಯಾಮತ್ ಹೋಗಿ’ ಹಾಡಿಗೆ ಮಜವಾದ ರೀಲ್ ಮಾಡಿದ್ದಾರೆ. ಹಿರಿಯ ನಟರ ಈ ಅದ್ಭುತ ವಿಡಿಯೊ ಇಂಟರ್ನೆಟ್ನಲ್ಲಿ ಬಿರುಗಾಳಿ ಎಬ್ಬಿಸಿದ್ದು, ಪೋಸ್ಟ್ ಆದ ಕೆಲವೇ ಗಂಟೆಗಳಲ್ಲಿ ಭರ್ಜರಿ 138 ಮಿಲಿಯನ್ಗಿಂತಲೂ ಹೆಚ್ಚು (13.8 ಕೋಟಿಗೂ ಅಧಿಕ) ವೀಕ್ಷಣೆಗಳನ್ನು ಪಡೆದುಕೊಂಡಿದೆ.
ವಿಡಿಯೊಗೆ ಸಿಕ್ಕ ಪ್ರತಿಕ್ರಿಯೆಯಿಂದ ಖುಷಿಯಾದ ನಟ ರಣವೀರ್ ಶೋರೆ ತಮ್ಮ ಎಕ್ಸ್ (X) ಖಾತೆಯಲ್ಲಿ ಅನುಪಮ್ ಖೇರ್ ಅವರಿಗೆ ಧನ್ಯವಾದ ತಿಳಿಸಿದ್ದಾರೆ. ‘ನಮ್ಮನ್ನು 100 ಮಿಲಿಯನ್ ವೀಕ್ಷಣೆಗಳ ಕ್ಲಬ್ಗೆ ಸೇರಿಸಿದ್ದಕ್ಕಾಗಿ ಧನ್ಯವಾದಗಳು’ ಎಂದು ರಣವೀರ್ ಬರೆದುಕೊಂಡಿದ್ದಾರೆ. ಇನ್ನು ಈ ವಿಡಿಯೋ ಹಂಚಿಕೊಂಡಿದ್ದ ಅನುಪಮ್ ಖೇರ್, ‘ಖೋಸ್ಲಾ ಮತ್ತು ಖುರಾನಾ ಎಂದಿಗೂ ಒಂದಾಗಲು ಸಾಧ್ಯವಿಲ್ಲ, ಇಲ್ಲೂ ಕೂಡ! ಜೈ ಹೋ!’ ಎಂದು ತಮಾಷೆಯಾಗಿ ಕ್ಯಾಪ್ಷನ್ ನೀಡಿದ್ದರು.
ಇದನ್ನೂ ಓದಿ: ಜಟಾಯು ಪಾತ್ರಕ್ಕೆ ಅನುಪಮ್ ಖೇರ್ ಎಂಟ್ರಿ; ಇಲ್ಲಿದೆ ‘ರಾಮಾಯಣ’ ಕಲಾವಿದರ ಫುಲ್ ಲಿಸ್ಟ್
ಅಂದಹಾಗೆ, ಈ ನಟರೆಲ್ಲರೂ ಒಟ್ಟಿಗೆ ಅಭಿನಯಿಸಿರುವ ‘ಖೋಸ್ಲಾ ಕಾ ಘೋಸ್ಲಾ 2’ ಸಿನಿಮಾ ಆಗಸ್ಟ್ 28 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಇದು 2006 ರಲ್ಲಿ ಸೂಪರ್ ಹಿಟ್ ಆಗಿದ್ದ ‘ಖೋಸ್ಲಾ ಕಾ ಘೋಸ್ಲಾ’ ಚಿತ್ರದ ಸೀಕ್ವೆಲ್ ಆಗಿದೆ. ಪ್ರಶಾಂತ್ ಬಾಂಗಿಯಾ ನಿರ್ದೇಶನದ ಈ ಸಿನಿಮಾದಲ್ಲಿ ಹಳೆಯ ತಾರಾಗಣದ ಜೊತೆಗೆ ಹಲವು ಹೊಸ ಕಲಾವಿದರೂ ಕಾಣಿಸಿಕೊಂಡಿದ್ದಾರೆ. ಅನುಪಮ್ ಖೇರ್, ಬೋಮನ್ ಇರಾನಿ, ರಣವೀರ್ ಶೋರೆ, ಪರ್ವೀನ್ ದಬಾಸ್, ತಾರಾ ಶರ್ಮಾ ಮತ್ತು ಕಿರಣ್ ಜುನೇಜಾ ಮುಖ್ಯ ಭೂಮಿಕೆಯಲ್ಲಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.