ಟೀಮ್ ಇಂಡಿಯಾದ ವಿಶ್ವ ದಾಖಲೆಯ ನಾಗಾಲೋಟಕ್ಕೆ ಕೊನೆಗೂ ಬ್ರೇಕ್ ಬಿದ್ದಿದೆ. ಬ್ರೇಕ್ ಹಾಕಿರುವುದು ಮತ್ಯಾರೂ ಅಲ್ಲ, ಐರ್ಲೆಂಡ್ ತಂಡ. ಬೆಲ್ಫಾಸ್ಟ್ನಲ್ಲಿ ನಡೆದ ಭಾರತದ ವಿರುದ್ಧದ 2 ಪಂದ್ಯಗಳ ಟಿ20 ಸರಣಿಯನ್ನು ಐರ್ಲೆಂಡ್ ತಂಡವು 2-0 ಅಂತರದಿಂದ ಗೆದ್ದುಕೊಂಡಿದೆ. ಈ ಮೂಲಕ ಭಾರತದ ಸತತ 16 ಟಿ20 ಸರಣಿಗಳ ಅಜೇಯ ನಾಗಾಲೋಟಕ್ಕೆ ಐರ್ಲೆಂಡ್ ಬ್ರೇಕ್ ಹಾಕಿದೆ.
ಆಗಸ್ಟ್ 2023 ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿ ಸೋಲಿನ ನಂತರ, ಟೀಮ್ ಇಂಡಿಯಾ ಕಳೆದ 1,050 ದಿನಗಳಿಂದ (ಸುಮಾರು 3 ವರ್ಷಗಳು) ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ ಒಂದೇ ಒಂದು ದ್ವಿಪಕ್ಷೀಯ ಸರಣಿಯನ್ನು ಸೋತಿರಲಿಲ್ಲ. ಈ ವಿಶ್ವ ದಾಖಲೆ ಇದೀಗ ಕೊನೆಗೊಂಡಿದೆ.
ಸಾರ್ವಕಾಲಿಕ ದಾಖಲೆ:
ಟಿ20 ಇತಿಹಾಸದಲ್ಲಿ ಐಸಿಸಿ ಪೂರ್ಣ ಪ್ರಮಾಣದ ಸದಸ್ಯ ರಾಷ್ಟ್ರಗಳ ಪೈಕಿ ಭಾರತ ತಂಡದ ಈ 16 ಸರಣಿಗಳ ಅಜೇಯ ನಾಗಾಲೋಟವೇ ಅತ್ಯುನ್ನತ ವಿಶ್ವ ದಾಖಲೆಯಾಗಿದೆ. ಇದಕ್ಕೂ ಮುನ್ನ ಪಾಕಿಸ್ತಾನ್ ತಂಡ 2016 ರಿಂದ 2018 ರ ಅವಧಿಯಲ್ಲಿ ಸತತ 11 ಸರಣಿಗಳನ್ನು ಗೆದ್ದುಕೊಂಡಿದ್ದರು.
ಆದರೆ 2023 ರಿಂದ ಸರಣಿ ಗೆಲುವಿನ ನಾಗಾಲೋಟ ಶುರು ಮಾಡಿದ್ದ ಟೀಮ್ ಇಂಡಿಯಾ ಸತತ 16 ಸರಣಿಗಳಲ್ಲಿ ಜಯಭೇರಿ ಬಾರಿಸಿದ್ದರು. ಈ ಮೂಲಕ ಟೀಮ್ ಇಂಡಿಯಾ, ಐಸಿಸಿ ಪೂರ್ಣ ಪ್ರಮಾಣದ ಸದಸ್ಯ ರಾಷ್ಟ್ರಗಳ ಪೈಕಿ ಸತತವಾಗಿ ಅತ್ಯಧಿಕ ಸರಣಿ ಗೆದ್ದ ತಂಡವೆಂಬ ವಿಶ್ವ ದಾಖಲೆ ನಿರ್ಮಿಸಿದ್ದರು.
ಇದೀಗ ಈ ವಿಶ್ವ ದಾಖಲೆಯ ಓಟವು ಕೊನೆಗೊಂಡಿದೆ. ಸತತ 16 ಸರಣಿಗಳನ್ನು ಗೆದ್ದುಕೊಂಡಿದ್ದ ಟೀಮ್ ಇಂಡಿಯಾ 17ನೇ ಸರಣಿಯಲ್ಲಿ ಐರ್ಲೆಂಡ್ ವಿರುದ್ಧ ಮುಗ್ಗರಿಸಿದೆ. ಹೀಗಾಗಿ ಇಂಗ್ಲೆಂಡ್ ವಿರುದ್ಧ ಟಿ20 ಸರಣಿಯ ಮೂಲಕ ಟೀಮ್ ಇಂಡಿಯಾ ಹೊಸ ಆರಂಭ ಪಡೆಯಬೇಕಿದೆ.
ಇದನ್ನೂ ಓದಿ: ಮೆಸ್ಸಿ ಪಡೆಗೆ ರತ್ನಗಂಬಳಿ: ಅರ್ಜೆಂಟೀನಾ ಫೈನಲ್ ಹಾದಿ ಸುಲಭ!
ಭಾರತ ಇಂಗ್ಲೆಂಡ್ ಸರಣಿ ಯಾವಾಗ?
ಭಾರತ ಮತ್ತು ಇಂಗ್ಲೆಂಡ್ ನಡುವಣ ಟಿ20 ಸರಣಿಯು ಜುಲೈ 1 ರಿಂದ ಶುರುವಾಗಲಿದೆ. ಇಂಗ್ಲೆಂಡ್ನಲ್ಲಿ ಜರುಗಲಿರುವ ಈ ಸರಣಿಯಲ್ಲಿ ಟೀಮ್ ಇಂಡಿಯಾ 5 ಪಂದ್ಯಗಳನ್ನಾಡಲಿದೆ. ಈ ಐದು ಮ್ಯಾಚ್ಗಳ ಮೂಲಕ ಭಾರತ ತಂಡವು ಗೆಲುವಿನ ಲಯಕ್ಕೆ ಮರಳಬೇಕಾದ ಅನಿವಾರ್ಯತೆ ಇದೆ. ಈ ಸರಣಿಯ ವೇಳಾಪಟ್ಟಿ ಈ ಕೆಳಗಿನಂತಿದೆ…
ಭಾರತ vs ಇಂಗ್ಲೆಂಡ್ ಟಿ20 ಸರಣಿ ವೇಳಾಪಟ್ಟಿ 2026:
| ಪಂದ್ಯ | ದಿನಾಂಕ (2026) | ಕ್ರೀಡಾಂಗಣ (ಸ್ಥಳ) | ಸಮಯ (ಭಾರತೀಯ ಕಾಲಮಾನ) |
|---|---|---|---|
| 1ನೇ ಟಿ20 | ಜುಲೈ 1, ಬುಧವಾರ | ರಿಸರ್ಸೈಡ್ ಗ್ರೌಂಡ್, ಚೆಸ್ಟರ್-ಲೆ-ಸ್ಟ್ರೀಟ್ | ರಾತ್ರಿ 10:00 ಗಂಟೆಗೆ |
| 2ನೇ ಟಿ20 | ಜುಲೈ 4, ಶನಿವಾರ | ಓಲ್ಡ್ ಟ್ರಾಫರ್ಡ್, ಮ್ಯಾಂಚೆಸ್ಟರ್ | ರಾತ್ರಿ 7:00 ಗಂಟೆಗೆ |
| 3ನೇ ಟಿ20 | ಜುಲೈ 7, ಮಂಗಳವಾರ | ಟ್ರೆಂಟ್ ಬ್ರಿಡ್ಜ್, ನಾಟಿಂಗ್ಹ್ಯಾಮ್ | ರಾತ್ರಿ 10:00 ಗಂಟೆಗೆ |
| 4ನೇ ಟಿ20 | ಜುಲೈ 9, ಗುರುವಾರ | ಕೌಂಟಿ ಗ್ರೌಂಡ್, ಬ್ರಿಸ್ಟಲ್ | ರಾತ್ರಿ 10:00 ಗಂಟೆಗೆ |
| 5ನೇ ಟಿ20 | ಜುಲೈ 11, ಶನಿವಾರ | ದಿ ರೋಸ್ ಬೌಲ್ (ಯುಟಿಲಿಟಾ ಬೌಲ್), ಸೌತಾಂಪ್ಟನ್ | ರಾತ್ರಿ 7:00 ಗಂಟೆಗೆ |
ಈ ಐದು ಮ್ಯಾಚ್ಗಳ ಸರಣಿ ಬಳಿಕ ಟೀಮ್ ಇಂಡಿಯಾ ಇಂಗ್ಲೆಂಡ್ ವಿರುದ್ಧ 3 ಪಂದ್ಯಗಳ ಏಕದಿನ ಸರಣಿ ಆಡಲಿದೆ. ಈ ಸರಣಿಯು ಜುಲೈ 14 ರಿಂದ ಶುರುವಾಗಲಿದೆ.
Published On – 11:49 am, Mon, 29 June 26