ಇಂದಿನ ವೇಗದ ಜೀವನಶೈಲಿಯಲ್ಲಿ ಹೆಚ್ಚಿನವರು ಗಂಟೆಗಳ ಕಾಲ ಕುಳಿತು ಕೆಲಸ ಮಾಡುತ್ತಾರೆ. ಇದರಿಂದ ದೈಹಿಕ ಚಟುವಟಿಕೆ ಕಡಿಮೆಯಾಗಿ, ಹಲವು ಆರೋಗ್ಯ ಸಮಸ್ಯೆಗಳ ಅಪಾಯ ಹೆಚ್ಚಾಗಬಹುದು. ಇಂತಹ ಸಂದರ್ಭಗಳಲ್ಲಿ ಪ್ರತಿದಿನ 30 ನಿಮಿಷಗಳ ಕಾಲ ನಡೆಯುವುದು (Walking) ಆರೋಗ್ಯಕರ ಜೀವನಕ್ಕೆ ಸರಳ ಮತ್ತು ಪರಿಣಾಮಕಾರಿ ಮಾರ್ಗ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ. ಹಾಗಾದರೆ 30 ನಿಮಿಷ ನಡೆಯುವುದರಿಂದ ಯಾವ ರೀತಿಯ ಆರೋಗ್ಯ ಪ್ರಯೋಜನ ಸಿಗುತ್ತದೆ, ನಡೆಯುವ ಸರಿಯಾದ ವಿಧಾನ ಯಾವುದು, ಯಾವ ವಿಷಯಗಳ ಬಗ್ಗೆ ಗಮನ ಕೊಡಬೇಕು ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

30 ನಿಮಿಷ ನಡೆಯುವುದರಿಂದ ಸಿಗುವ ಲಾಭಗಳು;

ತಜ್ಞರ ಪ್ರಕಾರ, ನಿಯಮಿತವಾಗಿ ನಡೆಯುವುದರಿಂದ ಹೃದಯದ ಆರೋಗ್ಯ ಸುಧಾರಿಸುತ್ತದೆ ಮತ್ತು ರಕ್ತಸಂಚಾರ ಉತ್ತಮಗೊಳ್ಳುತ್ತದೆ. ಇದು ಸ್ನಾಯುಗಳು ಹಾಗೂ ಎಲುಬುಗಳನ್ನು ಬಲಪಡಿಸುವುದರ ಜೊತೆಗೆ ತೂಕ ನಿಯಂತ್ರಣಕ್ಕೂ ಸಹಕಾರಿಯಾಗಿದೆ. ಜೊತೆಗೆ ವಾಕಿಂಗ್ ಮಾಡುವ ಅಭ್ಯಾಸವು ಮಾನಸಿಕ ಆರೋಗ್ಯಕ್ಕೂ ಉತ್ತಮ. ಇದು ಒತ್ತಡವನ್ನು ಕಡಿಮೆ ಮಾಡಿ, ಮನಸ್ಥಿತಿಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಅಲ್ಲದೆ ದೇಹದ ಶಕ್ತಿಯನ್ನು ಹೆಚ್ಚಿಸಿ, ಉತ್ತಮ ನಿದ್ರೆಗೆ ಸಹಕಾರಿಯಾಗಬಹುದು. ಜೀರ್ಣಕ್ರಿಯೆಯೂ ಸುಗಮವಾಗಲು ನೆರವಾಗುತ್ತದೆ.

ನಡೆಯುವ ಸರಿಯಾದ ವಿಧಾನ:

ಸಾಮಾನ್ಯವಾಗಿ ನಡೆಯುವಾಗ ದೇಹವನ್ನು ನೇರವಾಗಿ ಇಟ್ಟುಕೊಳ್ಳಿ ಮತ್ತು ದೃಷ್ಟಿಯನ್ನು ಮುಂದಕ್ಕೆ ಕೇಂದ್ರೀಕರಿಸಿ. ಆರಂಭದಲ್ಲಿ ನಿಧಾನವಾಗಿ ನಡೆದು, ನಂತರ ಕ್ರಮೇಣ ವೇಗವನ್ನು ಹೆಚ್ಚಿಸಬಹುದು. ಆರಾಮದಾಯಕ ಉಡುಪು ಮತ್ತು ಉತ್ತಮ ಗುಣಮಟ್ಟದ ಶೂಗಳನ್ನು ಧರಿಸುವುದು ಮುಖ್ಯ. ಬೆಳಿಗ್ಗೆ ಅಥವಾ ಸಂಜೆ ಸಮಯವನ್ನು ನಡೆಯಲು ಉತ್ತಮವೆಂದು ಪರಿಗಣಿಸಲಾಗುತ್ತದೆ. ಆದರೆ ಸಮಯದ ಅಭಾವವಿದ್ದರೆ ದಿನದ ಯಾವುದೇ ವೇಳೆಯಲ್ಲೂ ನಿಯಮಿತವಾಗಿ ನಡೆಯಬಹುದು.

ಗಮನಿಸಲೇಬೇಕಾದ ವಿಷಯಗಳು:

ನಡೆಯುವ ಮೊದಲು ಸ್ವಲ್ಪ ವಾರ್ಮ್-ಅಪ್ ಮಾಡುವುದು ಉತ್ತಮ. ವಾಕಿಂಗ್ ಮುಗಿದ ನಂತರ ಕೆಲವು ನಿಮಿಷ ನಿಧಾನವಾಗಿ ನಡೆದು ದೇಹವನ್ನು ಸಾಮಾನ್ಯ ಸ್ಥಿತಿಗೆ ತರಬೇಕು. ಸಾಕಷ್ಟು ನೀರು ಕುಡಿಯುವುದು ಕೂಡ ಅಗತ್ಯ. ಹೃದಯದ ಸಮಸ್ಯೆ, ಸಂಧಿವಾತ ಅಥವಾ ಇತರ ಆರೋಗ್ಯ ಸಮಸ್ಯೆಗಳಿರುವವರು ನಿಯಮಿತ ವಾಕ್ ಆರಂಭಿಸುವ ಮೊದಲು ವೈದ್ಯರ ಸಲಹೆ ಪಡೆಯಬೇಕು. ದಿನಕ್ಕೆ ಕೇವಲ 30 ನಿಮಿಷಗಳ ವಾಕ್ ದೇಹ ಮತ್ತು ಮನಸ್ಸಿನ ಆರೋಗ್ಯವನ್ನು ಕಾಪಾಡಲು ಸಹಕಾರಿ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ