ಇಂಗ್ಲೆಂಡ್ ಫುಟ್ಬಾಲ್ ತಂಡದ ಪಾಲಿನ ಶಾಪ ಎಂದೇ ಪರಿಗಣಿಸಲಾಗಿರುವ “ಎರಡನೇ ಪಂದ್ಯದ ಕಂಟಕ” 2026ರ ಫಿಫಾ ವಿಶ್ವಕಪ್ನಲ್ಲೂ ಮುಂದುವರಿದಿದೆ. ಫಾಕ್ಸ್ಬರೋದಲ್ಲಿರುವ ‘ಬಾಸ್ಟನ್ ಸ್ಟೇಡಿಯಂ’ನಲ್ಲಿ ನಡೆದ ಈ ಪಂದ್ಯದಲ್ಲಿ ಬಲಿಷ್ಠ ಇಂಗ್ಲೆಂಡ್ ತಂಡವು ಘಾನಾ ತಂಡವನ್ನು ಎದುರಿಸಿತ್ತು.
ಬಲಿಷ್ಠ ಕ್ರೊಯೇಷಿಯಾ ವಿರುದ್ಧ ಮೊದಲ ಪಂದ್ಯದಲ್ಲಿ 4-2 ಅಂತರದಿಂದ ಗೆದ್ದಿದ್ದ ಇಂಗ್ಲೆಂಡ್ ತಂಡವು ಘಾನಾ ವಿರುದ್ಧ ಕೂಡ ಪ್ರಚಂಡ ಪ್ರದರ್ಶನ ನೀಡಲಿದ್ದಾರೆ ಎಂದೇ ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ ಈ ನಿರೀಕ್ಷೆಯನ್ನು ಘಾನಾ ಡಿಫೆಂಡರ್ಗಳು ಮೊದಲಾರ್ಧದಲ್ಲೇ ಸುಳ್ಳಾಗಿಸಿದ್ದರು.
ಏಕೆಂದರೆ ಈ ಪಂದ್ಯದಲ್ಲಿ ಶಿಸ್ತುಬದ್ಧ ರಕ್ಷಣಾತ್ಮಕ ಆಟ ಪ್ರದರ್ಶಿಸಿದ ಘಾನಾ ಮೊದಲ 45 ನಿಮಿಷಗಳಲ್ಲಿ ಇಂಗ್ಲೆಂಡ್ ಮುನ್ಪಡೆ ಆಟಗಾರರಿಗೆ ಗೋಲಿನ ಕಡೆಗೆ ಒಂದೂ ನಿಖರವಾದ ಶೂಟ್ ಮಾಡಲು ಅವಕಾಶ ನೀಡಿರಲಿಲ್ಲ.
ಹ್ಯಾರಿ ಕೇನ್, ಜೂಡ್ ಬೆಲ್ಲಿಂಗ್ಹ್ಯಾಮ್, ನೋನಿ ಮಡುವೆಕೆ, ಮತ್ತು ಆಂಥೋನಿ ಗಾರ್ಡನ್ನಂತಹ ಬಲಿಷ್ಠ ಫಾವರ್ಡ್ ಪ್ಲೇಯರ್ಗಳಿದ್ದರೂ ಇಂಗ್ಲೆಂಡ್ ತಂಡವು ದ್ವಿತೀಯಾರ್ಧದಲ್ಲೂ ನಿರಾಸೆ ಅನುಭವಿಸಿತು.
ಇನ್ನು ದ್ವಿತೀಯಾರ್ಧದಲ್ಲಿ ಬುಕಾಯೊ ಸಾಕಾ, ನಿಕೊ ಒ’ರೈಲಿ, ಮತ್ತು ಮಾರ್ಕಸ್ ರಾಶ್ಫೋರ್ಡ್ ಅವರನ್ನು ಕಣಕ್ಕಿಳಿಸಿದರೂ ಇಂಗ್ಲೆಂಡ್ ತಂಡಕ್ಕೆ ಘಾನಾ ತಂಡ ರಕ್ಷಣಾ ಬೇಲಿಯನ್ನು ಭೇದಿಸಲು ಸಾಧ್ಯವಾಗಲೇ ಇಲ್ಲ. ಪರಿಣಾಮ ಪಂದ್ಯವು 0-0 ಅಂತರದಿಂದ ಕೊನೆಗೊಂಡಿತು.
ದ್ವಿತೀಯ ಪಂದ್ಯದ ಕಂಟಕ:
ಇಂಗ್ಲೆಂಡ್ ತಂಡವು ವಿಶ್ವಕಪ್ ಮತ್ತು ಯುರೋ ಕಪ್ ನಂತಹ ಪ್ರಮುಖ ಟೂರ್ನಿಗಳಲ್ಲಿ “ಎರಡನೇ ಗ್ರೂಪ್ ಪಂದ್ಯ”ವನ್ನು ಗೆಲ್ಲಲಾಗದೆ ಪರದಾಡುವುದು ಇದು ಮೊದಲೇನಲ್ಲ. ಈ ಹಿಂದಿನಿಂದಲೂ ಇಂಗ್ಲೆಂಡ್ ಪಾಲಿಗೆ ಇದೊಂದು ಕಂಟಕವಾಗಿ ಪರಿಣಮಿಸಿದೆ. ಹೀಗಾಗಿ ಆಂಗ್ಲರ ಪಡೆಯನ್ನು “ಸೆಕೆಂಡ್ ಗೇಮ್ ಸಿಂಡ್ರೋಮ್” ತಂಡ ಗೇಲಿ ಮಾಡಲಾಗುತ್ತದೆ. ಇದಕ್ಕೆ ಮುಖ್ಯ ಕಾರಣ ಸತತ 4 ಪ್ರಮುಖ ಟೂರ್ನಿಗಳಲ್ಲಿ ಇಂಗ್ಲೆಂಡ್ 2ನೇ ಪಂದ್ಯದಲ್ಲಿ ಗೆಲುವು ಸಾಧಿಸಿಲ್ಲ ಎಂಬುದು.
- 1998ರ ವಿಶ್ವಕಪ್: ಮೊದಲ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡ ಟುನೀಶಿಯಾ (Tunisia) ವಿರುದ್ಧ 2-0 ಗೋಲುಗಳ ಭರ್ಜರಿ ಗೆಲುವು ಸಾಧಿಸಿತ್ತು. ಆದರೆ ಎರಡನೇ ಪಂದ್ಯದಲ್ಲಿ ದುರ್ಬಲ ರೊಮೇನಿಯಾ ವಿರುದ್ಧ 2-1 ಅಂತರದಿಂದ ಸೋತಿದ್ದರು.
- 2010ರ ವಿಶ್ವಕಪ್: ಮೊದಲ ಪಂದ್ಯದಲ್ಲಿ ಯುಎಸ್ಎ ವಿರುದ್ಧ 1-1 ಅಂತರದಿಂದ ಡ್ರಾ ಸಾಧಿಸಿದ್ದ ಇಂಗ್ಲೆಂಡ್, ದ್ವಿತೀಯ ಪಂದ್ಯದಲ್ಲಿ ದುರ್ಬಲ ಅಲ್ಜೀರಿಯಾ ವಿರುದ್ಧ (0-0) ಗೆಲ್ಲಲು ವಿಫಲರಾಗಿದ್ದರು.
- 2014ರ ವಿಶ್ವಕಪ್: ಮೊದಲ ಪಂದ್ಯದಲ್ಲಿ ಬಲಿಷ್ಠ ಇಟಲಿ ವಿರುದ್ಧ 2-1 ಗೋಲುಗಳಿಂದ ಸೋಲು ಅನುಭವಿಸಿದ್ದ ಇಂಗ್ಲೆಂಡ್, ದ್ವಿತೀಯ ಪಂದ್ಯದಲ್ಲಿ ಉರುಗ್ವೆ ವಿರುದ್ಧ 2-1 ಅಂತರದಿಂದ ಪರಾಜಯಗೊಂಡಿದ್ದರು.
- 2021ರ ಯುರೋ ಕಪ್: ಮೊದಲ ಪಂದ್ಯದಲ್ಲಿ ಕ್ರೊಯೇಷಿಯಾವನ್ನು ಸೋಲಿಸಿದ್ದ ಇಂಗ್ಲೆಂಡ್, ಎರಡನೇ ಪಂದ್ಯದಲ್ಲಿ ಸ್ಕಾಟ್ಲ್ಯಾಂಡ್ ವಿರುದ್ಧ 0-0 ಡ್ರಾ ಮಾಡಿಕೊಂಡಿತ್ತು.
- 2022ರ ಫಿಫಾ ವಿಶ್ವಕಪ್: ಮೊದಲ ಪಂದ್ಯದಲ್ಲಿ ಇರಾನ್ ವಿರುದ್ಧ 6-2 ರ ಭರ್ಜರಿ ಗೆಲುವು ಸಾಧಿಸಿದ್ದ ಇಂಗ್ಲೆಂಡ್, ಎರಡನೇ ಪಂದ್ಯದಲ್ಲಿ ಅಮೆರಿಕ ವಿರುದ್ಧ 0-0 ನೀರಸ ಡ್ರಾ ಸಾಧಿಸಿತ್ತು.
- 2024ರ ಯುರೋ ಕಪ್: ಮೊದಲ ಪಂದ್ಯದಲ್ಲಿ ಸೆರ್ಬಿಯಾವನ್ನು ಸೋಲಿಸಿದರೂ, ಎರಡನೇ ಪಂದ್ಯದಲ್ಲಿ ಡೆನ್ಮಾರ್ಕ್ ವಿರುದ್ಧ 1-1 ರಿಂದ ಡ್ರಾ ಮಾಡಿಕೊಂಡು ನಿರಾಸೆ ಅನುಭವಿಸಿತ್ತು.
- 2026ರ ಫಿಫಾ ವಿಶ್ವಕಪ್: ಕ್ರೊಯೇಷಿಯಾ ವಿರುದ್ಧ 4-2 ರ ಅದ್ಭುತ ಗೆಲುವು ಸಾಧಿಸಿದ ಇಂಗ್ಲೆಂಡ್, ಘಾನಾ ವಿರುದ್ಧ ಮತ್ತೆ 0-0 ಡ್ರಾ ಸಾಧಿಸಿದೆ.
ಇದನ್ನೂ ಓದಿ: IPL 2027: ಬಿಗ್ ಟ್ರೇಡ್… ಇಬ್ಬರು ಆಟಗಾರರ ತಂಡಗಳು ಅದಲು-ಬದಲು
ಹೀಗಾಗಿಯೇ ಇಂಗ್ಲೆಂಡ್ ತಂಡದ ಈ ಡ್ರಾ ಅನ್ನು ಸ್ಟಾರ್ ಆಟಗಾರ ಜೂಡ್ ಬೆಲ್ಲಿಂಗ್ಹ್ಯಾಮ್ ಇದು ನಮ್ಮ ತಂಡಕ್ಕೆ ತಗುಲಿರುವ “ಸೆಕೆಂಡ್ ಗೇಮ್ ಫೀವರ್” ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
