ನಟ ಹಾಗೂ ಡ್ಯಾನ್ಸರ್ ರಾಘವ್ ಜುಯಲ್ ಅವರ ಜನ್ಮದಿನದ ಪಾರ್ಟಿ ಗುರುವಾರ ರಾತ್ರಿ ನಡೆಯಿತು. ಈ ಸಂಭ್ರಮದಲ್ಲಿ ಚಿತ್ರರಂಗದ ಹಲವು ಗಣ್ಯರು ಭಾಗವಹಿಸಿದ್ದರು. ಅದರಲ್ಲಿ ಶಾರುಖ್ ಖಾನ್ ಪುತ್ರ ಆರ್ಯನ್ ಖಾನ್ ಅವರ ಎಂಟ್ರಿ ಮತ್ತು ಎಕ್ಸಿಟ್ ವಿಡಿಯೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿವೆ. ಅವರು ನೂಕು ನುಗ್ಗಲಿನಲ್ಲಿ ಸಿಲುಕಿ ಒದ್​ದಾಡಿದ್ದಾರೆ.

ಆರ್ಯನ್ ಕಾಲಿಗೆ ಬಿದ್ದ ವ್ಯಕ್ತಿ

ವೈರಲ್ ಆಗಿರುವ ಒಂದು ವಿಡಿಯೋದಲ್ಲಿ ಆರ್ಯನ್ ಖಾನ್ ಜನದಟ್ಟಣೆಯ ನಡುವೆ ಸಾಗುತ್ತಿರುವುದು ಕಾಣಿಸಿದೆ. ಈ ವೇಳೆ ಭದ್ರತಾ ಸಿಬ್ಬಂದಿ ಅವರಿಗೆ ದಾರಿ ಮಾಡಿಕೊಡಲು ಹರಸಾಹಸ ಪಡುತ್ತಿದ್ದರು. ಆ ನೂಕುನುಗ್ಗಲಿನಲ್ಲಿ ಒಬ್ಬ ವ್ಯಕ್ತಿ ನಿಯಂತ್ರಣ ತಪ್ಪಿ ಆರ್ಯನ್ ಕಾಲಿಗೆ ಬಿದ್ದಿದ್ದಾನೆ. ತಕ್ಷಣವೇ ಸೆಕ್ಯೂರಿಟಿ ತಂಡ ಆ ವ್ಯಕ್ತಿಯನ್ನು ಮೇಲೆತ್ತಿ ಆರ್ಯನ್ ಅವರನ್ನು ಕಾರಿನವರೆಗೆ ಸುರಕ್ಷಿತವಾಗಿ ಕರೆದೊಯ್ದಿದೆ. ಈ ಗದ್ದಲದಿಂದ ಆರ್ಯನ್ ಖಾನ್ ಸ್ವಲ್ಪ ಅಸಮಾಧಾನಗೊಂಡಂತೆ ಕಂಡಿದ್ದಾರೆ.

ಲಿಫ್ಟ್‌ನಲ್ಲಿ ಕುಳಿತ ಆರ್ಯನ್

ಮತ್ತೊಂದು ವಿಡಿಯೋದಲ್ಲಿ ಆರ್ಯನ್ ಖಾನ್ ಜನರಿಂದ ತುಂಬಿಹೋಗಿದ್ದ ಲಿಫ್ಟ್‌ನಲ್ಲಿದ್ದರು. ಅಲ್ಲಿ ಜಾಗವಿಲ್ಲದೆ ಜನರು ಒಬ್ಬರನ್ನೊಬ್ಬರು ತಳ್ಳಾಡುತ್ತಿದ್ದರು. ಈ ವೇಳೆ ಜನದಟ್ಟಣೆಯಿಂದ ತಪ್ಪಿಸಿಕೊಳ್ಳಲು ಆರ್ಯನ್ ಕೆಳಗೆ ಕುಳಿತುಕೊಂಡಿದ್ದಾರೆ. ಈ ವಿಡಿಯೋ ನೋಡಿ ಅಭಿಮಾನಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ. ಇಷ್ಟೊಂದು ಗೊಂದಲದ ವಾತಾವರಣ ನಿರ್ಮಾಣವಾಗಿದ್ದಕ್ಕೆ ಬೇಸರ ಹೊರಹಾಕಿದ್ದಾರೆ.

ರಾಘವ್ ಮತ್ತು ಆರ್ಯನ್ ಸಂಬಂಧ

ಆರ್ಯನ್ ಖಾನ್ ಕಪ್ಪು ಬಣ್ಣದ ಜಾಕೆಟ್ ಮತ್ತು ಜೀನ್ಸ್ ಧರಿಸಿ ಸರಳವಾಗಿ ಪಾರ್ಟಿಗೆ ಬಂದಿದ್ದರು. ಅವರು ಲೋ ಪ್ರೊಫೈಲ್ ಕಾಯ್ದುಕೊಳ್ಳಲು ಯತ್ನಿಸಿದರೂ ಫೋಟೋಗ್ರಾಫರ್‌ಗಳು ಮತ್ತು ಅಭಿಮಾನಿಗಳು ಅವರನ್ನು ಮುತ್ತಿಕೊಂಡರು. ಆರ್ಯನ್ ಖಾನ್ ನಿರ್ದೇಶನದ ‘ಬ್ಯಾಡ್ಸ್ ಆಫ್ ಬಾಲಿವುಡ್’ ಸರಣಿಯಲ್ಲಿ ರಾಘವ್ ನಟಿಸಿದ್ದಾರೆ. ಈ ವೆಬ್ ಸರಣಿ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಿ ಒಂದು ವರ್ಷವಾಗುತ್ತ ಬಂದಿದೆ. ಆ ವೃತ್ತಿಪರ ಒಡನಾಟದ ಹಿನ್ನೆಲೆಯಲ್ಲಿ ಆರ್ಯನ್ ಈ ಪಾರ್ಟಿಗೆ ಬಂದಿದ್ದರು.

ಒಟ್ಟಿಗೆ ಕಾಣಿಸಿಕೊಂಡ ಶೆಹನಾಜ್ – ರಾಘವ್

ಇದೇ ಪಾರ್ಟಿಯಲ್ಲಿ ನಟಿ ಶೆಹನಾಜ್ ಗಿಲ್ ಮತ್ತು ರಾಘವ್ ಜುಯಲ್ ಒಟ್ಟಿಗೆ ಕಾಣಿಸಿಕೊಂಡಿದ್ದಾರೆ. ಪಾರ್ಟಿ ಮುಗಿದ ನಂತರ ರಾಘವ್ ಅವರು ಶೆಹನಾಜ್ ಒಂದೇ ಕಾರಿನಲ್ಲಿ ತೆರಳಿದ್ದಾರೆ. 2023ರ ‘ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್’ ಸಿನಿಮಾದ ನಂತರ ಇವರಿಬ್ಬರ ಡೇಟಿಂಗ್ ವದಂತಿಗಳು ಕೇಳಿಬರುತ್ತಿವೆ. ಆದರೆ ಇಬ್ಬರೂ ತಾವು ಕೇವಲ ಉತ್ತಮ ಸ್ನೇಹಿತರು ಎಂದು ಹೇಳುತ್ತಾ ಬಂದಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.