ನವದೆಹಲಿ, ಮೇ 24: ಭಾರತದ ಯುವಜನರು ತಂತ್ರಜ್ಞಾನ ಕ್ಷೇತ್ರಕ್ಕೆ ಹೆಚ್ಚು ಆಕರ್ಷಿತರಾಗುತ್ತಿದ್ದಾರೆ. ವಿದ್ಯಾರ್ಥಿಗಳಿಂದ ಶುರುವಾಗುವ ಸ್ಟಾರ್ಟಪ್​ಗಳು ಡೀಪ್ ಟೆಕ್ ಕ್ಷೇತ್ರದಲ್ಲಿ ಹೆಚ್ಚು ಕೇಂದ್ರಿತವಾಗುತ್ತಿವೆ ಎನ್ನುವ ದತ್ತಾಂಶ ಹೊರಬಂದಿದೆ. ಕ್ಯಾಂಪಸ್ ಫಂಡ್ (Campus Fund) ಬಿಡುಗಡೆ ಮಾಡಿರುವ ‘ಸ್ಟೇಟ್ ಆಫ್ ಸ್ಟೂಡೆಂಟ್ ಆಂಟ್ರಪ್ರೆನರ್‌ಶಿಪ್ ಇನ್ ಇಂಡಿಯಾ’ (State of Student Entrepreneurship in India) ವರದಿಯ 5ನೇ ಆವೃತ್ತಿಯ ಪ್ರಕಾರ, ಭಾರತೀಯ ಕಾಲೇಜು ವಿದ್ಯಾರ್ಥಿಗಳು ಆರಂಭಿಸುತ್ತಿರುವ ಸ್ಟಾರ್ಟ್‌ಅಪ್‌ಗಳಲ್ಲಿ ಇದೇ ಮೊದಲ ಬಾರಿಗೆ ಡೀಪ್-ಟೆಕ್ (Deep-Tech) ಅತ್ಯಂತ ದೊಡ್ಡ ವಿಭಾಗವಾಗಿ ಹೊರಹೊಮ್ಮಿದೆ. ಇದು ದೇಶದ ಸಾಂಪ್ರದಾಯಿಕ ಸ್ಟಾರ್ಟ್‌ಅಪ್ ಮಾರುಕಟ್ಟೆಯ ಚಿತ್ರಣವನ್ನೇ ಬದಲಾಯಿಸುತ್ತಿದೆ.

ಕೇವಲ ನಾಲ್ಕು ವರ್ಷಗಳ ಹಿಂದೆ ಡೀಪ್-ಟೆಕ್ ವಿಭಾಗವು ಸ್ಟುಡೆಂಟ್ ಸ್ಟಾರ್ಟ್‌ಅಪ್‌ಗಳ ಟಾಪ್ 5 ಪಟ್ಟಿಯಲ್ಲೂ ಇರಲಿಲ್ಲ. ಆದರೆ ಪ್ರಸ್ತುತ ವಿದ್ಯಾರ್ಥಿ ನೇತೃತ್ವದ ಸ್ಟಾರ್ಟ್‌ಅಪ್‌ಗಳಲ್ಲಿ ಶೇ. 16.87 ರಷ್ಟು ಡೀಪ್-ಟೆಕ್ ವಲಯಕ್ಕೆ ಸೇರಿವೆ. ಇದರಲ್ಲಿ ಪ್ರಮುಖವಾಗಿ ಅಪ್ಲೈಡ್ ಎಐ (Applied AI) ಮತ್ತು ಕ್ರಾಸ್-ಡೊಮೇನ್ ಸಂಶೋಧನೆಗಳು ಸೇರಿವೆ. ಕ್ವಾಂಟಮ್ ಕಂಪ್ಯೂಟಿಂಗ್ ಮತ್ತು ಫೋಟೋನಿಕ್ಸ್‌ನಂತಹ ಸುಧಾರಿತ ತಂತ್ರಜ್ಞಾನಗಳೂ ಮುಂದಿನ ಹಂತದಲ್ಲಿ ಬೆಳೆಯುತ್ತಿವೆ.

ಕುಸಿತ ಕಂಡ EdTech ಮತ್ತು ಸರ್ವಿಸ್ ಸೆಕ್ಟರ್ಸ್

ಜೆನೆರೇಟಿವ್ ಎಐ (Generative AI) ಮತ್ತು ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್‌ಗಳ (LLM) ಆಗಮನದಿಂದಾಗಿ, ಹಳೆಯ ಮಾದರಿಯ ಕೋಚಿಂಗ್ ಮತ್ತು ಕಂಟೆಂಟ್ ಕ್ರಿಯೇಷನ್ ಆಧಾರಿತ ಎಡ್-ಟೆಕ್ (ಶಿಕ್ಷಣ ತಂತ್ರಜ್ಞಾನ) ಸ್ಟಾರ್ಟ್‌ಅಪ್‌ಗಳ ಸಂಖ್ಯೆ ಶೇ. 36 ರಷ್ಟು ಕುಸಿದಿದೆ. ಅದೇ ರೀತಿ, ಸಾಂಪ್ರದಾಯಿಕ ಸೇವಾ ವಲಯದ (Services) ಸ್ಟಾರ್ಟ್‌ಅಪ್‌ಗಳು ಶೇ. 52 ರಷ್ಟು ಕುಸಿತ ಕಂಡಿವೆ. ವಿದ್ಯಾರ್ಥಿಗಳು ಈಗ ಸುಲಭವಾಗಿ ಕಾಪಿ ಮಾಡಬಹುದಾದ ವ್ಯವಹಾರಗಳ ಬದಲಿಗೆ, ನಕಲು ಮಾಡಲು ಕಷ್ಟವಾಗಿರುವ ಬಲವಾದ ತಂತ್ರಜ್ಞಾನದ (Defensible Technology) ಕಡೆಗೆ ಮುಖ ಮಾಡುತ್ತಿದ್ದಾರೆ.

ಇದನ್ನೂ ಓದಿ: ಅಗ್ಗದ ಇಂಧನ ಮತ್ತು ಸ್ಥಿರ ಪೂರೈಕೆ ಇವತ್ತು ಜಗತ್ತಿಗೆ ಅವಶ್ಯಕ: ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಜೈಶಂಕರ್, ರುಬಿಯೋ ಹೇಳಿಕೆ

ಸಂಶೋಧನೆ ಮತ್ತು ಪಿಎಚ್‌ಡಿ (PhD) ಸಂಸ್ಥಾಪಕರ ಹೆಚ್ಚಳ

ಭಾರತದ ಕ್ಯಾಂಪಸ್‌ಗಳಲ್ಲಿ ಕೇವಲ ಪದವಿ ವಿದ್ಯಾರ್ಥಿಗಳು ಮಾತ್ರವಲ್ಲದೆ, ಉನ್ನತ ಸಂಶೋಧನೆ ಮಾಡುವ ಪಿಎಚ್‌ಡಿ (PhD) ವಿದ್ಯಾರ್ಥಿಗಳೂ ಸ್ಟಾರ್ಟ್‌ಅಪ್ ಕ್ಷೇತ್ರಕ್ಕೆ ಧುಮುಕುತ್ತಿದ್ದಾರೆ. ಪಿಎಚ್‌ಡಿ ಸಂಸ್ಥಾಪಕರ ಸಂಖ್ಯೆ 2020-21ರಲ್ಲಿ ಕೇವಲ 35 ಇದ್ದದ್ದು, ಈಗ (2024-25ರಲ್ಲಿ) 237 ಕ್ಕೆ (7 ಪಟ್ಟು) ಏರಿಕೆಯಾಗಿದೆ. ಇವರು ಕಾರ್ಪೊರೇಟ್ ಉದ್ಯೋಗಗಳಿಗೆ ಇಳಿಯದೆ, ಪ್ರಯೋಗಾಲಯದ ಸಂಶೋಧನೆಗಳನ್ನು ನೇರವಾಗಿ ಮಾರುಕಟ್ಟೆಯ ಉತ್ಪನ್ನಗಳನ್ನಾಗಿ ಪರಿವರ್ತಿಸುತ್ತಿರುವ ಕಾಯಕ ನಡೆಸುತ್ತಿದ್ದಾರೆ.

ಸ್ಟುಡೆಂಟ್ ಸ್ಟಾರ್ಟಪ್​ಗಳು ಕರ್ನಾಟಕದಲ್ಲೇ ಹೆಚ್ಚು

ಈ ಹಿಂದೆ ಭಾರತದ ಸ್ಟುಡೆಂಟ್ ಸ್ಟಾರ್ಟ್‌ಅಪ್‌ಗಳ ಪೈಕಿ ಶೇ. 60 ಕ್ಕೂ ಹೆಚ್ಚು ಬೆಂಗಳೂರು, ದೆಹಲಿ, ಮುಂಬೈ ಮತ್ತು ಹೈದರಾಬಾದ್‌ನಂತಹ ಮೆಟ್ರೋ ನಗರಗಳಲ್ಲೇ ಕೇಂದ್ರೀಕೃತವಾಗಿದ್ದವು. ಆದರೆ ಈಗ ಅಲ್ಲಿ ಅದು ಶೇ. 40 ಕ್ಕಿಂತ ಕಡಿಮೆಯಾಗಿದೆ.

ನಗರಗಳ ಮಟ್ಟದಲ್ಲಿ ಇದೇ ಮೊದಲ ಬಾರಿಗೆ ದೆಹಲಿ (ಶೇ. 13.27) ವಿದ್ಯಾರ್ಥಿ ಸ್ಟಾರ್ಟ್‌ಅಪ್‌ಗಳ ಸಂಖ್ಯೆಯಲ್ಲಿ ಬೆಂಗಳೂರನ್ನು (ಶೇ. 12.99) ಹಿಂದಿಕ್ಕಿದೆ.

ರಾಜ್ಯಗಳ ಮಟ್ಟದಲ್ಲಿ ಕರ್ನಾಟಕ (ಶೇ. 15.29) ಇನ್ನೂ ಮೊದಲ ಸ್ಥಾನದಲ್ಲಿದೆ. ದೆಹಲಿ, ಮಹಾರಾಷ್ಟ್ರ ಮತ್ತು ತಮಿಳುನಾಡು ರಾಜ್ಯಗಳು ತೀವ್ರ ಪೈಪೋಟಿ ನೀಡುತ್ತಿವೆ.

ಕೇವಲ 50,000 ಕ್ಕಿಂತ ಕಡಿಮೆ ಜನಸಂಖ್ಯೆ ಇರುವ ರಾಜಸ್ಥಾನದ ಪಿಲಾನಿ (Pilani) ಎಂಬ ಸಣ್ಣ ಪಟ್ಟಣವು ದೇಶದ ಒಟ್ಟು ವಿದ್ಯಾರ್ಥಿ ಸ್ಟಾರ್ಟ್‌ಅಪ್‌ಗಳ ಹರಿವಿನಲ್ಲಿ ಶೇ. 1.02 ರಷ್ಟು ಕೊಡುಗೆ ನೀಡುತ್ತಿದೆ. ಬಿಟ್ಸ್ ಪಿಲಾನಿ (BITS Pilani) ಮತ್ತು ಐಐಟಿ ಮದ್ರಾಸ್‌ನಂತಹ ಶಿಕ್ಷಣ ಸಂಸ್ಥೆಗಳು ಸ್ಟಾರ್ಟ್‌ಅಪ್‌ಗಳ ಪ್ರಮುಖ ಕೇಂದ್ರಗಳಾಗಿವೆ.

ಇದನ್ನೂ ಓದಿ: ನಮ್ಮ ನಿಮ್ಮ ಎಸ್​ಐಪಿಗಳು ವಿದೇಶೀ ಹೂಡಿಕೆದಾರರಿಗೆ ಆಹಾರವಾಗುತ್ತಿವೆಯಾ? ಜೆಫರೀಸ್ ಏಜೆನ್ಸಿ ಬಿಚ್ಚಿಟ್ಟಿದೆ ಘೋರ ಸತ್ಯ

ಕ್ಯಾಂಪಸ್ ಫಂಡ್‌ನ ಸಂಸ್ಥಾಪಕಿ ಮತ್ತು ಸಿಇಒ ರಿಚಾ ಬಾಜಪಾಯಿ ಮಾತನಾಡಿ, “ಐದು ವರ್ಷಗಳ ಹಿಂದೆ ‘ವಿದ್ಯಾರ್ಥಿಗಳು ದೊಡ್ಡ ಕಂಪನಿಗಳನ್ನು ಕಟ್ಟಲು ಸಾಧ್ಯವೇ?’ ಎಂಬ ಪ್ರಶ್ನೆ ಇತ್ತು. ಆದರೆ ಇಂದು ಆ ಪ್ರಶ್ನೆ ಇಲ್ಲ. ಈಗಿರುವ ಪ್ರಶ್ನೆಯೇನೆಂದರೆ, ವಿದ್ಯಾರ್ಥಿಗಳು ಅಭಿವೃದ್ಧಿಪಡಿಸುತ್ತಿರುವ ಅತ್ಯಾಧುನಿಕ ತಂತ್ರಜ್ಞಾನಕ್ಕೆ ಪೂರಕವಾಗಿ ಭಾರತದ ಬಂಡವಾಳ, ನೀತಿಗಳು ಮತ್ತು ಶೈಕ್ಷಣಿಕ ಮೂಲಸೌಕರ್ಯಗಳು ವೇಗವಾಗಿ ಸ್ಪಂದಿಸಲು ಸಿದ್ಧವಾಗಿವೆಯೇ? ಎಂಬುದಾಗಿದೆ” ಎಂದು ಹೇಳುತ್ತಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ