ಜೀರಿಗೆ ಅಸಲಿಯೋ ಅಥವಾ ನಕಲಿಯೋ?Image Credit source: tilda.com
ಭಾರತೀಯ ಪಾಕಪದ್ಧತಿಯಲ್ಲಿ ಜೀರಿಗೆಗೆ ಅತ್ಯಂತ ಪ್ರಮುಖ ಸ್ಥಾನವಿದೆ. ಒಗ್ಗರಣೆಯಿಂದ ಹಿಡಿದು ಆರೋಗ್ಯಕರ ಕಷಾಯಗಳವರೆಗೆ ಬಹುತೇಕ ಎಲ್ಲಾ ಖಾದ್ಯಗಳಲ್ಲೂ ಜೀರಿಗೆಯನ್ನು ಬಳಸಲಾಗುತ್ತದೆ. ಆದರೆ, ಇತ್ತೀಚಿನ ದಿನಗಳಲ್ಲಿ ಹೆಚ್ಚುತ್ತಿರುವ ಕಲಬೆರಕೆಯಿಂದಾಗಿ ಮಾರುಕಟ್ಟೆಯಲ್ಲಿ ನಕಲಿ ಅಥವಾ ಕೃತಕ ಬಣ್ಣ ಬೆರೆಸಿದ ಜೀರಿಗೆಯ ಮಾರಾಟ ಜಾಲ ಹೆಚ್ಚಾಗುತ್ತಿದೆ. ಇಂತಹ ನಕಲಿ ಜೀರಿಗೆಯು ಅಡುಗೆಯ ರುಚಿಯನ್ನಷ್ಟೇ ಅಲ್ಲ, ನಿಮ್ಮ ಕುಟುಂಬದ ಆರೋಗ್ಯವನ್ನೂ ಕೆಡಿಸುತ್ತದೆ. ಹಾಗಾದರೆ, ನೀವು ಕೊಂಡುಕೊಳ್ಳುವ ಜೀರಿಗೆ ಶುದ್ಧವಾಗಿದೆಯೇ ಎಂದು ಮನೆಯಲ್ಲೇ ಪರೀಕ್ಷಿಸುವುದು ಹೇಗೆ? ಇಲ್ಲಿವೆ ಸರಳ ಮಾರ್ಗಗಳು.
ಸುವಾಸನೆ ಮತ್ತು ಬಣ್ಣದ ಮೂಲಕ ಗುರುತಿಸಿ:
ನಿಜವಾದ ಜೀರಿಗೆಯನ್ನು ಗುರುತಿಸಲು ಅದರ ಗಾಢವಾದ ಸುವಾಸನೆಯೇ ಮೊದಲ ಬಂಡವಾಳ. ಅಸಲಿ ಜೀರಿಗೆಯು ಬಲವಾದ ಮತ್ತು ತೀಕ್ಷ್ಣವಾದ ನೈಸರ್ಗಿಕ ಪರಿಮಳವನ್ನು ಹೊಂದಿರುತ್ತದೆ. ಆದರೆ ನಕಲಿ ಅಥವಾ ಹಳೆಯ ಜೀರಿಗೆಯಲ್ಲಿ ಯಾವುದೇ ವಾಸನೆ ಇರುವುದಿಲ್ಲ ಅಥವಾ ಕೃತಕ ಕೆಮಿಕಲ್ ವಾಸನೆ ಬರುತ್ತದೆ. ಅಲ್ಲದೆ, ನಿಜವಾದ ಜೀರಿಗೆ ಬೀಜಗಳು ಏಕರೂಪದ ಆಕಾರದಲ್ಲಿ, ಕಂದು ಬಣ್ಣದಲ್ಲಿ ಮತ್ತು ಲಘು ಹೊಳಪನ್ನು ಹೊಂದಿರುತ್ತವೆ. ಕಲಬೆರಕೆ ಜೀರಿಗೆಯ ಆಕಾರವು ಅಸಮವಾಗಿದ್ದು, ತುಂಬಾ ಗಾಢ ಬಣ್ಣದಿಂದ ಕೂಡಿರುತ್ತದೆ.
ನೀರಿನ ಲೋಟದಲ್ಲಿ ಪರೀಕ್ಷೆ:
ಒಂದು ಲೋಟ ನೀರನ್ನು ತೆಗೆದುಕೊಂಡು ಅದಕ್ಕೆ ಒಂದು ಚಮಚ ಜೀರಿಗೆಯನ್ನು ಹಾಕಿ ಸ್ವಲ್ಪ ಸಮಯ ಬಿಡಿ. ನಿಜವಾದ ಜೀರಿಗೆಯು ತೂಕವಿರುವುದರಿಂದ ಸಾಮಾನ್ಯವಾಗಿ ನೀರಿನ ತಳಕ್ಕೆ ಮುಳುಗುತ್ತದೆ. ಆದರೆ ಅದರಲ್ಲಿ ಬೆರೆಸಿರುವ ಕಸ, ಮರಳು ಅಥವಾ ಕೃತಕ ವಸ್ತುಗಳು ಹಗುರವಾಗಿರುವುದರಿಂದ ನೀರಿನ ಮೇಲ್ಮೈಯಲ್ಲಿ ತೇಲತೊಡಗುತ್ತವೆ. ಎಲ್ಲಕ್ಕಿಂತ ಮುಖ್ಯವಾಗಿ, ಜೀರಿಗೆ ಹಾಕಿದ ತಕ್ಷಣ ನೀರು ಕೃತಕವಾಗಿ ಬಣ್ಣ ಬದಲಾಯಿಸಿದರೆ, ಅದಕ್ಕೆ ಕೆಮಿಕಲ್ ಬಣ್ಣ ಬಳಿಯಲಾಗಿದೆ ಎಂದು ನೀವು ಸುಲಭವಾಗಿ ಪತ್ತೆಹಚ್ಚಬಹುದು.
ಇದನ್ನೂ ಓದಿ: ಮಳೆ ನೀರಿನಲ್ಲಿ ನೆನೆಯುವುದರಿಂದ ಎಷ್ಟೆಲ್ಲಾ ಪ್ರಯೋಜನಗಳಿವೆ ಗೊತ್ತಾ?
ಕೈಗಳಿಂದ ಉಜ್ಜಿ ಪರೀಕ್ಷೆ ಮಾಡಿ:
ಸ್ವಲ್ಪ ಜೀರಿಗೆಯನ್ನು ನಿಮ್ಮ ಹಸ್ತದ (ಕೈಗಳ) ನಡುವೆ ಇಟ್ಟು ಜೋರಾಗಿ ಉಜ್ಜಿ ನೋಡಿ. ಉಜ್ಜಿದ ನಂತರ ಜೀರಿಗೆಯಿಂದ ಇನ್ನು ಹೆಚ್ಚಿನ ನೈಸರ್ಗಿಕ ಪರಿಮಳ ಹೊರಬಂದರೆ ಅದು ಉತ್ತಮ ಗುಣಮಟ್ಟದ ಜೀರಿಗೆಯಾಗಿರುತ್ತದೆ. ಒಂದು ವೇಳೆ ಉಜ್ಜಿದಾಗ ನಿಮ್ಮ ಕೈಗಳಿಗೆ ಕಪ್ಪು ಅಥವಾ ಕೃತಕ ಬಣ್ಣ ಅಂಟಿಕೊಂಡರೆ ಇಲ್ಲವೇ ಅಸ್ವಾಭಾವಿಕ ಕೆಮಿಕಲ್ ವಾಸನೆ ಬಂದರೆ, ಆ ಜೀರಿಗೆಯನ್ನು ಬಳಸದಿರುವುದೇ ಒಳಿತು.
ಖರೀದಿಸುವಾಗ ಈ ಮುನ್ನೆಚ್ಚರಿಕೆ ವಹಿಸಿ:
ಆಹಾರ ಪದಾರ್ಥಗಳಲ್ಲಿ ಆಗುವ ಕಲಬೆರಕೆಯಿಂದ ದೂರವಿರಲು, ಗ್ರಾಹಕರು ಯಾವಾಗಲೂ ಗುಣಮಟ್ಟ, ಪ್ಯಾಕೇಜಿಂಗ್ ದಿನಾಂಕ ಮತ್ತು ಉತ್ಪನ್ನದ ಮಾಹಿತಿಯನ್ನು (FSSAI ಲೋಗೋ) ಪರಿಶೀಲಿಸಬೇಕು. ರಸ್ತೆಬದಿಯಲ್ಲಿ ಅತ್ಯಂತ ಅಗ್ಗದ ಬೆಲೆಗೆ ಸಿಗುತ್ತದೆ ಎಂದು ಜೀರಿಗೆಯನ್ನು ಖರೀದಿಸುವ ಮುನ್ನ ಎಚ್ಚರವಿರಲಿ. ಯಾವಾಗಲೂ ವಿಶ್ವಾಸಾರ್ಹ ಬ್ರ್ಯಾಂಡ್ ಅಥವಾ ಪ್ರಮಾಣೀಕೃತ ಅಂಗಡಿಗಳಿಂದಲೇ ಮಸಾಲೆ ಪದಾರ್ಥಗಳನ್ನು ಖರೀದಿಸುವುದು ಸುರಕ್ಷಿತ.
ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ