ಗ್ರಹ ಮಂಡಲದ ಸ್ಥಿತಿಯಂತೆ, ನವಗ್ರಹಗಳಲ್ಲಿ ಸೇನಾಧಿಪತಿಯಾದ ಮಂಗಳ ಗ್ರಹವು ಮಿಥುನ ರಾಶಿಯಲ್ಲಿದ್ದು ಆರ್ದ್ರಾ ನಕ್ಷತ್ರದ 4ನೇ ಪಾದದಲ್ಲಿ ಸಂಚರಿಸುತ್ತಿದ್ದಾನೆ. ಜಾತಕದ ಪ್ರಮುಖ ಕೇಂದ್ರ ಹಾಗೂ ತ್ರಿಕೋಣ ಸ್ಥಾನಗಳ ಮೇಲೆ ಕುಜನ ಪ್ರಭಾವ, ಆತನ ವಿಶೇಷ ದೃಷ್ಟಿಗಳು ಅಂದರೆ 4, 7 ಹಾಗೂ 8ನೇ ದೃಷ್ಟಿ ಮತ್ತು ದಿಗ್ದಿಕ್ಕಿನ ಬಲದ ಆಧಾರದ ಮೇಲೆ ದ್ವಾದಶ ರಾಶಿಗಳ ಮೇಲೆ ಉಂಟಾಗುವ ಶುಭಾಶುಭ ಫಲಗಳು ಉಂಟಾಗಲಿದೆ.
ದಿಗ್ಬಲ ಹಾಗೂ ಯೋಗಗಳ ಪ್ರಭಾವ :
ಜ್ಯೋತಿಷ್ಯ ಶಾಸ್ತ್ರದ ನಿಯಮದಂತೆ ಕುಜನು ದಶಮ ಭಾವದಲ್ಲಿ ಅತ್ಯಂತ ಶಕ್ತಿಶಾಲಿ ದಿಗ್ದಿಕ್ಕಿನ ಬಲವನ್ನು ಪಡೆಯುತ್ತಾನೆ. ಮಿಥುನದಲ್ಲಿರುವ ಕುಜನು ಕನ್ಯಾ ರಾಶಿಯ ಮೇಲೆ ತನ್ನ 4ನೇ ದೃಷ್ಟಿಯನ್ನು ಬೀರಿದಾಗ, ವೃತ್ತಿ ಸ್ಥಾನವಾದ 10ನೇ ಭಾವಕ್ಕೆ ಅಪಾರವಾದ ಚೈತನ್ಯ ಸಿಗುತ್ತದೆ. ಇದಲ್ಲದೆ ಕರ್ಕಾಟಕದಲ್ಲಿ ಸ್ವಕ್ಷೇತ್ರೀಯವಾಗಿ ಉಚ್ಚ ಸ್ಥಿತಿಯಲ್ಲಿರುವ ಗುರು ಮತ್ತು ಸಿಂಹ ರಾಶಿಯಲ್ಲಿ ಸೂರ್ಯ-ಬುಧರ ಸಮ್ಮಿಲನದಿಂದ ಸೃಷ್ಟಿಯಾಗಿರುವ ಬುಧಾದಿತ್ಯ ಯೋಗಗಳು ಕುಜನ ಪ್ರಭಾವವನ್ನು ಮತ್ತಷ್ಟು ತೀಕ್ಷ್ಣಗೊಳಿಸಿವೆ.
ರಾಶಿಯ ಪ್ರಕಾರ ಶುಭಾಶುಭ ಫಲ :
ಮಂಗಳನ ಸಂಚಾರವು ಮುಖ್ಯವಾಗಿ ಮೇಷ, ಸಿಂಹ, ಕನ್ಯಾ ಹಾಗೂ ಮಕರ ರಾಶಿಯವರಿಗೆ ಅತ್ಯಂತ ಸಾತ್ವಿಕ ಹಾಗೂ ಯಶಸ್ವಿ ಫಲಗಳನ್ನು ತರಲಿದೆ. ಮೇಷ ರಾಶಿಗೆ 3ನೇ ಭಾವದಲ್ಲಿ ಬಲಶಾಲಿ ಕುಜನ ಸಂಚಾರವಿರುವುದರಿಂದ ಸಾಹಸ, ಪರಾಕ್ರಮ ಮತ್ತು ಆಸ್ತಿ ವ್ಯವಹಾರಗಳಲ್ಲಿ ಅಪ್ರತಿಮ ಯಶಸ್ಸು ಸಿಗಲಿದೆ. 11ನೇ ಲಾಭ ಭಾವದಲ್ಲಿ ಕುಜನಿದ್ದು, ಲಗ್ನದಲ್ಲಿ ಬುಧಾದಿತ್ಯ ಯೋಗ ಹೊಂದಿರುವ ಸಿಂಹ ರಾಶಿಯವರಿಗೆ ಹಳೆಯ ಹೂಡಿಕೆಗಳಿಂದ ಪ್ರಚಂಡ ಧನಲಾಭ ಹಾಗೂ ಸಮಾಜದಲ್ಲಿ ಉನ್ನತ ಗೌರವ ಪ್ರಾಪ್ತಿಯಾಗಲಿದೆ.
ದಶಮ ಭಾವದಲ್ಲಿ ಕುಜನ ಪ್ರಭಾವ ಹಾಗೂ ದಿಗ್ಬಲದ ಬೆಂಬಲ ಪಡೆಯುವ ಕನ್ಯಾ ರಾಶಿಯ ಉದ್ಯೋಗಿಗಳಿಗೆ ಬಡ್ತಿ, ಸರ್ಕಾರಿ ಕೆಲಸಗಳಲ್ಲಿ ಯಶಸ್ಸು ಮತ್ತು ನಾಯಕತ್ವದ ಜವಾಬ್ದಾರಿಗಳು ಒದಗಿಬರಲಿವೆ. ಇನ್ನು 6ನೇ ಭಾವದಲ್ಲಿ ಕುಜನ ಶತ್ರುಘ್ನ ಯೋಗವನ್ನು ಎದುರಿಸಲಿರುವ ಮಕರ ರಾಶಿಯವರು ಶತ್ರುಗಳ ಮೇಲೆ ಸಂಪೂರ್ಣ ಜಯ ಸಾಧಿಸಲಿದ್ದು, ಹಳೆಯ ಸಾಲ ಹಾಗೂ ಕೋರ್ಟ್-ಕಚೇರಿ ಪ್ರಕರಣಗಳಿಂದ ಮುಕ್ತಿ ಪಡೆಯಲಿದ್ದಾರೆ.
ಮತ್ತೊಂದೆಡೆ, ಮಿಥುನ, ಧನು, ವೃಶ್ಚಿಕ ಹಾಗೂ ಮೀನ ರಾಶಿಯವರು ಈ ಅವಧಿಯಲ್ಲಿ ತುಸು ಎಚ್ಚರಿಕೆ ವಹಿಸುವುದು ಲೇಸು. ಲಗ್ನದಲ್ಲೇ ಕುಜನ ಸಂಚಾರವಿರುವ ಮಿಥುನ ರಾಶಿಯವರು ತೀವ್ರ ಕೋಪ, ರಕ್ತದೊತ್ತಡ ಮತ್ತು ಆತುರದ ನಿರ್ಧಾರಗಳಿಂದ ನಷ್ಟ ಅನುಭವಿಸುವ ಸಾಧ್ಯತೆಯಿದೆ. 7ನೇ ಭಾವಕ್ಕೆ ಕುಜನ ಸಂಪೂರ್ಣ ದೃಷ್ಟಿ ಬೀಳುವ ಧನು ರಾಶಿಯವರಿಗೆ ವೈವಾಹಿಕ ಜೀವನದಲ್ಲಿ ಮನಸ್ತಾಪ ಹಾಗೂ ಪಾಲುದಾರಿಕೆ ಉದ್ಯಮದಲ್ಲಿ ಭಿನ್ನಾಭಿಪ್ರಾಯಗಳು ಎದುರಾಗಬಹುದು.
ಅಷ್ಟಮ ಭಾವದಲ್ಲಿ ರಾಶ್ಯಾಧಿಪತಿ ಕುಜನಿರುವ ವೃಶ್ಚಿಕ ರಾಶಿಯವರು ವಾಹನ ಚಾಲನೆ ಹಾಗೂ ಯಂತ್ರೋಪಕರಣಗಳನ್ನು ಬಳಸುವಾಗ ಅತ್ಯಂತ ಜಾಗರೂಕರಾಗಿರಬೇಕು. ಗಾಯ ಅಥವಾ ಶಸ್ತ್ರಚಿಕಿತ್ಸೆಯ ಯೋಗವಿರುತ್ತದೆ. 4ನೇ ಭಾವದಲ್ಲಿ ಕುಜನ ಪ್ರಮುಖ ಪ್ರಭಾವವಿರುವ ಮೀನ ರಾಶಿಯವರಿಗೆ ಮನೆಯಲ್ಲಿ ಶಾಂತಿಯ ಕೊರತೆ ಹಾಗೂ ಮಾತೃವರ್ಗದ ಆರೋಗ್ಯದಲ್ಲಿ ಏರುಪೇರಾಗುವ ಸಾಧ್ಯತೆಯಿದೆ.
ಇದನ್ನೂ ಓದಿ: ನಿಮ್ಮ ರಾಶಿಗನುಗುಣವಾಗಿ ಆ.9ರಿಂದ 15ರ ವರೆಗಿನ ವಾರದ ಪ್ರೇಮ – ಪ್ರೀತಿ ಭವಿಷ್ಯ ಇಲ್ಲಿ ತಿಳಿಯಿರಿ
ಉಳಿದಂತೆ 2ನೇ ಭಾವದ ಕುಜದಿಂದ ವೃಷಭ ರಾಶಿಯವರಿಗೆ ಆರ್ಥಿಕ ಹರಿವಿದ್ದರೂ ಕುಟುಂಬದಲ್ಲಿ ವಾಗ್ವಾದ ಹೆಚ್ಚಾಗಬಹುದು. 12ನೇ ಭಾವದ ಕುಜನಿಂದ ಕರ್ಕಾಟಕ ರಾಶಿಯವರಿಗೆ ವಿದೇಶಿ ಅವಕಾಶಗಳು ಸಿಕ್ಕರೂ ವೈದ್ಯಕೀಯ ವೆಚ್ಚಗಳು ಏರಲಿವೆ. 9ನೇ ಭಾಗ್ಯ ಭಾವದಲ್ಲಿ ಕುಜನಿರುವ ತುಲಾ ರಾಶಿಯವರಿಗೆ ತಂದೆಯವರ ಆರೋಗ್ಯದ ಕಾಳಜಿ ಅಗತ್ಯವಿದ್ದು, 5ನೇ ಭಾವದಲ್ಲಿ ಕುಜನಿರುವ ಕುಂಭ ರಾಶಿಯವರು ಮಕ್ಕಳ ಶಿಕ್ಷಣ ಮತ್ತು ಆರೋಗ್ಯದ ಕಡೆಗೆ ವಿಶೇಷ ನಿಗಾ ಇಡಬೇಕಾಗುತ್ತದೆ.
ಪರಿಹಾರ :
ಮಿಥುನ ರಾಶಿಯು ವಾಯು ತತ್ತ್ವದ್ದಾಗಿದ್ದು, ಕುಜನ ಅಗ್ನಿ ತತ್ತ್ವದೊಂದಿಗೆ ಸೇರಿದಾಗ ಮನಸ್ಸಿನಲ್ಲಿ ಆತುರ ಮತ್ತು ಉಗ್ರತೆಯನ್ನು ಹೆಚ್ಚಿಸುತ್ತದೆ. ಈ ದೋಷಗಳ ನಿವಾರಣೆಗೆ ಮಂಗಳವಾರದಂದು ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ಅಥವಾ ಹನುಮಂತನ ಉಪಾಸನೆ ಮಾಡುವುದು, ಚಾಲೀಸಾ ಪಠಿಸುವುದು ಹಾಗೂ ನಿತ್ಯವೂ ಧ್ಯಾನವನ್ನು ಅಭ್ಯಾಸ ಮಾಡುವುದು ಮಂಗಳಕರ.
– ಲೋಹಿತ್ ಹೆಬ್ಬಾರ್
ಜ್ಯೋತಿಷ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
