ಬೆಂಗಳೂರು, ಮೇ 4: ದಳಪತಿ ವಿಜಯ್ ಅವರ ಟಿವಿಕೆ ಪಕ್ಷವು ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ (Tamil Nadu assembly elections) ಜಯಭೇರಿ ಭಾರಿಸಿದ ಬಳಿಕ ಸಿನಿಮಾ ಮತ್ತು ಪೊಲಿಟಿಕ್ಸ್ ನಂಟಿನ ಕುರಿತು ಟಾಕ್ ಶುರುವಾಗಿದೆ. ರಾಜಕೀಯಕ್ಕೆ ಸಿನಿಮಾ ಒಳ್ಳೆಯ ರಹದಾರಿ ಎಂದು ಅನೇಕರು ಭಾವಿಸಿದ್ದಾರೆ. ಅದು ಅರ್ಧಸತ್ಯ ಎಂಬುದು ಅಂಕಿ ಅಂಶಗಳಿಂದ ತಿಳಿದುಬರುತ್ತದೆ. ಚಿತ್ರರಂಗದಿಂದ ಅನೇಕರು ರಾಜಕೀಯ ಪ್ರವೇಶಕ್ಕೆ ಯತ್ನಿಸಿದ್ದುಂಟು. ಅದರಲ್ಲಿ ಕೆಲವರು ಮಾತ್ರ ಯಶಸ್ಸು ಪಡೆದಿದ್ದಾರೆ. ಅನೇಕರಿಗೆ ಸೋಲಾಗಿದೆ. ಉಕ್ರೇನ್ನ ಈಗಿನ ಅಧ್ಯಕ್ಷ ಝೆಲೆನ್ಸ್ಕಿ ಅವರು ಕಾಮಿಡಿಯನ್ ಆಗಿ ಜನಪ್ರಿಯರಾಗಿದ್ದವರು. ಅಮೆರಿಕದ ಮಾಜಿ ಅಧ್ಯಕ್ಷ ರೊನಾಲ್ಡ್ ರೇಗನ್ ಅವರು ಸಿನಿಮಾ ತಾರೆಯಾಗಿದ್ದವರು.
ಭಾರತದಲ್ಲಿ, ಅದರಲ್ಲೂ ದಕ್ಷಿಣ ಭಾರತದಲ್ಲಿ ಚಿತ್ರರಂಗದ ಮೂಲಕ ರಾಜಕೀಯ ಪ್ರವೇಶಿಸುವ ಪ್ರಯತ್ನಗಳು ಬಹಳಷ್ಟು ಆಗಿವೆ. ಇತ್ತೀಚಿನ ದಿನಗಳಲ್ಲಿ ಪವನ್ ಕಲ್ಯಾಣ್, ವಿಜಯ್, ಕಮಲಹಾಸನ್, ಉಪೇಂದ್ರ ಹೆಸರು ಪ್ರಮುಖವಾಗಿ ಕೇಳಿಬರುತ್ತದೆ. ನಟಿ ರಮ್ಯಾ ಕೂಡ ಸಂಸದೆಯಾಗಿ ಮತ್ತು ಸಕ್ರಿಯ ರಾಜಕಾರಣಿಯಾಗಿ ಕೆಲಸ ಮಾಡಿದ್ದಾರೆ. ಆದರೆ, ಯಶಸ್ಸು ಸಿಕ್ಕಿದ್ದು ಕಡಿಮೆ. ರಾಜಕೀಯದಲ್ಲಿ ಯಶಸ್ಸು ಮತ್ತು ಸೋಲು ಕಂಡ ಸಿನಿಮಾ ಸೆಲಬ್ರಿಟಿಗಳ ವಿವರ ಇಂತಿದೆ:
ಇದನ್ನೂ ಓದಿ: ತಮಿಳುನಾಡು ಇತಿಹಾಸದಲ್ಲಿ ಸಿಎಂ ಆದ ಚಿತ್ರರಂಗದ ತಾರೆಯರಿವರು
ರಾಜಕೀಯದಲ್ಲಿ ಯಶಸ್ಸು ಕಂಡ ಸಿನಿಮಾ ತಾರೆಗಳು
ತಮಿಳುನಾಡು
- ಎಂ.ಜಿ. ರಾಮಚಂದ್ರನ್ (MGR): ತಮಿಳುನಾಡಿನ ರಾಜಕೀಯ ಇತಿಹಾಸವನ್ನೇ ಬದಲಿಸಿದವರು. 1977 ರಿಂದ 1987 ರವರೆಗೆ ಸತತವಾಗಿ ಮುಖ್ಯಮಂತ್ರಿಯಾಗಿದ್ದರು.
- ಜೆ. ಜಯಲಲಿತಾ: ಎಂಜಿಆರ್ ಅವರ ಉತ್ತರಾಧಿಕಾರಿಯಾಗಿ ಬಂದ ಇವರು ಆರು ಬಾರಿ ಮುಖ್ಯಮಂತ್ರಿಯಾಗಿ ತಮಿಳುನಾಡನ್ನು ಆಳಿದರು.
- ಸಿ.ಎನ್. ಅಣ್ಣಾದೊರೈ: ಇವರು ನೇರವಾಗಿ ನಟರಲ್ಲದಿದ್ದರೂ, ಚಿತ್ರಕಥೆಗಾರರಾಗಿ ಸಿನಿಮಾ ಮೂಲಕವೇ ರಾಜಕೀಯ ತಳಹದಿ ನಿರ್ಮಿಸಿಕೊಂಡವರು.
- ಕರುಣಾನಿಧಿ: ಇವರೂ ಕೂಡ ಚಿತ್ರಸಾಹಿತಿಯಾಗಿ ಕೆಲಸ ಮಾಡುತ್ತಿದ್ದವರು. ಮುಂದೆ ಸಿಎಂ ಆಗಿ ತಮಿಳುನಾಡಿನಲ್ಲಿ ಹೆಸರುವಾಸಿಯಾದರು.
ಆಂಧ್ರಪ್ರದೇಶ
- ಎನ್.ಟಿ. ರಾಮರಾವ್ (NTR): ತೆಲುಗು ಚಿತ್ರರಂಗದ ಈ ಮಹಾನ್ ನಟ ತೆಲುಗು ದೇಶಂ ಪಾರ್ಟಿ (TDP) ಸ್ಥಾಪಿಸಿದ ಕೇವಲ 9 ತಿಂಗಳಲ್ಲೇ ಅಧಿಕಾರ ಹಿಡಿದು ಇತಿಹಾಸ ಸೃಷ್ಟಿಸಿದರು.
- ಪವನ್ ಕಲ್ಯಾಣ್: ‘ಜನಸೇನಾ’ ಪಕ್ಷದ ಮೂಲಕ ಇಂದು ಆಂಧ್ರ ರಾಜಕಾರಣದಲ್ಲಿ ಪ್ರಬಲ ಶಕ್ತಿಯಾಗಿ ಹೊರಹೊಮ್ಮಿದ್ದಾರೆ.
ಕರ್ನಾಟಕ
- ಅಂಬರೀಶ್: ಕೇಂದ್ರ ಸಚಿವರಾಗಿ, ರಾಜ್ಯದ ಸಚಿವರಾಗಿ ಮತ್ತು ಸಂಸದರಾಗಿ ಸುದೀರ್ಘ ಕಾಲ ರಾಜಕೀಯದಲ್ಲಿ ಯಶಸ್ವಿಯಾದವರು.
- ಬಿ.ಸಿ. ಪಾಟೀಲ್, ಸುಮಲತಾ ಅಂಬರೀಶ್, ಉಮಾಶ್ರೀ, ರಮ್ಯಾ: ಇವರು ಕೂಡ ಶಾಸಕರಾಗಿ ಮತ್ತು ಸಚಿವರಾಗಿ ಯಶಸ್ಸು ಕಂಡಿದ್ದಾರೆ.
ರಾಜಕೀಯದಲ್ಲಿ ನಿರೀಕ್ಷಿತ ಯಶಸ್ಸು ಕಾಣದವರು
ಸಿನಿಮಾದಲ್ಲಿ ಸೂಪರ್ ಸ್ಟಾರ್ ಆಗಿದ್ದರೂ, ರಾಜಕೀಯದಲ್ಲಿ ನೆಲೆ ಕಂಡುಕೊಳ್ಳಲು ವಿಫಲರಾದವರ ಪಟ್ಟಿ ಕೂಡ ದೊಡ್ಡದಿದೆ:
- ಶಿವಾಜಿ ಗಣೇಶನ್: ತಮಿಳುನಾಡಿನ ಶ್ರೇಷ್ಠ ನಟರಾಗಿದ್ದರೂ, ರಾಜಕೀಯದಲ್ಲಿ ಅವರು ದೊಡ್ಡ ಯಶಸ್ಸು ಕಾಣಲಿಲ್ಲ.
- ವಿಜಯಕಾಂತ್: ‘ಡಿಎಂಡಿಕೆ’ ಪಕ್ಷದ ಮೂಲಕ ಈ ಕ್ಯಾಪ್ಟನ್ ಭರವಸೆ ಮೂಡಿಸಿದರೂ, ನಂತರದ ದಿನಗಳಲ್ಲಿ ಅಸ್ತಿತ್ವ ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ.
- ಕಮಲ್ ಹಾಸನ್: ‘ಮಕ್ಕಳ್ ನೀಧಿ ಮೈಯಂ’ ಮೂಲಕ ರಾಜಕೀಯಕ್ಕೆ ಬಂದರೂ, ಚುನಾವಣೆಯಲ್ಲಿ ಹೇಳಿಕೊಳ್ಳುವಂತಹ ಸಾಧನೆ ಮಾಡಲಿಲ್ಲ.
- ಅಮಿತಾಭ್ ಬಚ್ಚನ್: 1984ರಲ್ಲಿ ಅಲಹಾಬಾದ್ನಿಂದ ಸಂಸದರಾಗಿ ಆಯ್ಕೆಯಾದರೂ, ಕೆಲವೇ ವರ್ಷಗಳಲ್ಲಿ ರಾಜಕೀಯಕ್ಕೆ ವಿದಾಯ ಹೇಳಿದರು.
- ಚಿರಂಜೀವಿ: ‘ಪ್ರಜಾರಾಜ್ಯಂ’ ಪಕ್ಷ ಸ್ಥಾಪಿಸಿ ನಂತರ ಕಾಂಗ್ರೆಸ್ ಜೊತೆ ವಿಲೀನಗೊಳಿಸಿದರು, ಆದರೆ ಎನ್ಟಿಆರ್ ತರಹದ ಯಶಸ್ಸು ಅವರಿಗೆ ಸಿಗಲಿಲ್ಲ.
- ಉಪೇಂದ್ರ: ‘ಪ್ರಜಾಕೀಯ’ ಮೂಲಕ ಹೊಸ ಉಪ್ಪಿ ಹೊಸ ಆಲೋಚನೆ ತಂದರೂ, ಮತದಾರರನ್ನು ಗೆಲ್ಲುವಲ್ಲಿ ಇನ್ನೂ ಯಶಸ್ವಿಯಾಗಿಲ್ಲ.
ಇದನ್ನೂ ಓದಿ: ಜನನಾಯಗನ್ ‘ಸೇಡು’?; ಬಿಜೆಪಿ ಕಾರಣಕ್ಕೆ ಎಐಎಡಿಎಂಕೆ ಬೇಡ ಅಂತಾರಾ ವಿಜಯ್?; ದಳಪತಿ ಮುಂದಿರುವ ಆಯ್ಕೆಗಳೇನು?
ವಿಶ್ವ ಮಟ್ಟದಲ್ಲಿ ಸಿನಿಮಾ ತಾರೆಗಳ ರಾಜಕೀಯ ಪಯಣ
ಭಾರತಕ್ಕೆ ಮಾತ್ರವಲ್ಲ, ವಿಶ್ವದಾದ್ಯಂತ ಸಿನಿಮಾ ನಟರು ರಾಜಕೀಯದಲ್ಲಿ ಮಿಂಚಿದ್ದಾರೆ:
- ರೊನಾಲ್ಡ್ ರೇಗನ್ (ಅಮೆರಿಕಾ): ಹಾಲಿವುಡ್ ನಟರಾಗಿದ್ದ ಇವರು ಅಮೆರಿಕಾದ 40ನೇ ಅಧ್ಯಕ್ಷರಾಗಿ (1981-1989) ಆಯ್ಕೆಯಾಗಿ ವಿಶ್ವದ ಅತ್ಯಂತ ಪ್ರಭಾವಶಾಲಿ ನಾಯಕರಾದರು.
- ಆರ್ನಾಲ್ಡ್ ಶ್ವಾರ್ಜಿನೆಗರ್: ‘ಟರ್ಮಿನೇಟರ್’ ಖ್ಯಾತಿಯ ಈ ನಟ ಕ್ಯಾಲಿಫೋರ್ನಿಯಾದ ಗವರ್ನರ್ ಆಗಿ ಎರಡು ಬಾರಿ ಆಯ್ಕೆಯಾದರು.
- ವೊಲೊಡಿಮಿರ್ ಝೆಲೆನ್ಸ್ಕಿ (ಉಕ್ರೇನ್): ಹಾಸ್ಯ ನಟನಾಗಿದ್ದ ಇವರು ಇಂದು ಉಕ್ರೇನ್ನ ಅಧ್ಯಕ್ಷರಾಗಿ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದ್ದಾರೆ.
- ಕ್ಲಿಂಟ್ ಈಸ್ಟ್ ವುಡ್: ಖ್ಯಾತ ಹಾಲಿವುಡ್ ನಟ ಕಾರ್ಮೆಲ್-ಬೈ-ದಿ-ಸೀ ನಗರದ ಮೇಯರ್ ಆಗಿ ಕಾರ್ಯನಿರ್ವಹಿಸಿದ್ದರು.
ತಮಿಳುನಾಡಿನಲ್ಲಿ ಈವರೆಗೆ 5 ಮಂದಿ ಮುಖ್ಯಮಂತ್ರಿಗಳು ಸಿನಿಮಾ ಹಿನ್ನೆಲೆಯಿಂದ ಬಂದವರಾಗಿದ್ದಾರೆ. ಅಮೆರಿಕಾದಲ್ಲಿ ಇಬ್ಬರು ಪ್ರಮುಖ ನಟರು ಉನ್ನತ ಸ್ಥಾನಕ್ಕೇರಿದ್ದಾರೆ. ಒಟ್ಟಾರೆಯಾಗಿ, ಸಿನಿಮಾದ ಜನಪ್ರಿಯತೆ ರಾಜಕೀಯಕ್ಕೆ ಬಾಗಿಲು ತೆರೆಯಬಹುದು, ಆದರೆ ಅಲ್ಲಿ ನೆಲೆ ನಿಲ್ಲಲು ಜನರೊಂದಿಗಿನ ನಿರಂತರ ಸಂಪರ್ಕ ಮತ್ತು ಆಡಳಿತ ಚಾತುರ್ಯ ಬಹಳ ಮುಖ್ಯ ಎಂಬುದು ಇತಿಹಾಸ ಸಾರುವ ಸತ್ಯ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ