ಕೀರ್ತಿ ಸುರೇಶ್ (Keerthy Suresh) ದಕ್ಷಿಣ ಭಾರತದ ಪ್ರತಿಭಾವಂತ ನಟಿ, ನಟನೆಗೆ ರಾಷ್ಟ್ರಪ್ರಶಸ್ತಿ ಪಡೆದಿರುವ ಕೀರ್ತಿ ಸುರೇಶ್ ದಕ್ಷಿಣದ ಹಲವಾರು ಸ್ಟಾರ್ ಹೀರೋಗಳ ಜೊತೆಗೆ ನಟಿಸಿದ್ದಾರೆ. ನಾಗ್ ಅಶ್ವಿನ್ ನಿರ್ದೇಶನದ ‘ಮಹಾನಟಿ’ ಸಿನಿಮಾದ ನಟನೆಗೆ ಕೀರ್ತಿ ಸುರೇಶ್ ಅವರಿಗೆ ರಾಷ್ಟ್ರಪ್ರಶಸ್ತಿ ದೊರಕಿತ್ತು. ಅಂದಹಾಗೆ ಅದೇ ನಾಗ್ ಅಶ್ವಿನಿ ನಿರ್ದೇಶಿಸಿದ ಭಾರಿ ಬಜೆಟ್​​ನ, ಬಹು ತಾರಾಗಣದ ‘ಕಲ್ಕಿ 2898 ಎಡಿ’ ಸಿನಿಮಾದ ಪ್ರಮುಖ ಪಾತ್ರವೊಂದನ್ನು ಕೀರ್ತಿ ಸುರೇಶ್​​ಗೆ ಆಫರ್ ಮಾಡಲಾಗಿತ್ತು. ಆದರೆ ಆ ಪಾತ್ರವನ್ನು ಕಿರ್ತಿ ಸುರೇಶ್ ನಿರಾಕರಿಸಿದರು.

ಆ ಬಗ್ಗೆ ಮಾತನಾಡಿರುವ ನಟಿ ಕೀರ್ತಿ ಸುರೇಶ್, ‘ನಾಗಿ (ನಾಗ್ ಅಶ್ವಿನ್) ನನಗೆ ‘ಕಲ್ಕಿ 2898 ಎಡಿ’ ಚಿತ್ರದಲ್ಲಿ ಪಾತ್ರವನ್ನು ನೀಡಿದ್ದರು, ಆದರೆ ಆ ಪಾತ್ರ ನನಗೆ ತುಂಬಾ ಇಷ್ಟವಾಗಿರಲಿಲ್ಲ, ಪಾತ್ರದಲ್ಲಿ ನಟಿಸುವುದೋ ಬೇಡವೊ ಎಂಬ ಗೊಂದಲದಲ್ಲಿ ಇದ್ದೆ. ಆದರೆ ನಂತರ ಒಂದು ದಿನ ಅವರು ನನಗೆ ಮೆಸೇಜ್ ಮಾಡಿ, ‘ಕನಿಷ್ಠ ಸಿನಿಮಾದ ಯಾವುದಾದರೂ ಒಂದು ದೃಶ್ಯದಲ್ಲಿ ಕಿಟಿಕಿಯಿಂದ ಇಣುಕಿ ನೋಡುವ ದೃಶ್ಯದಲ್ಲಾದರೂ ಮಾಡುತ್ತೀರಾ?’ ಎಂದು ಕೇಳಿದರು. ಅದಕ್ಕೆ ನಾನು, ‘ನಿಮ್ಮ ಚಿತ್ರದಲ್ಲಿ ಕೆಲಸ ಮಾಡಲು ನಾನು ಸಿದ್ಧ’ ಎಂದೆ. ನಾಗಿ ಅವರ ಚಿತ್ರದಲ್ಲಿ ನಾನು ಖಂಡಿತವಾಗಿಯೂ ಯಾವುದಾದರೂ ಪಾತ್ರವನ್ನು ಮಾಡುತ್ತೇನೆ ಎಂದು ನನಗೆ ಗೊತ್ತಿತ್ತು’ ಎಂದು ಕೀರ್ತಿ ಹೇಳಿದ್ದಾರೆ.

‘ನಾಗ್ ಅಶ್ವಿನ್ ಆಗ ನನಗಾಗಿ ನೀಡಿದ್ದ ಪಾತ್ರಕ್ಕೆ ನಾನು ‘ನೋ’ ಅಂದಿದ್ದ ಬಗ್ಗೆ ನನಗೆ ಖುಷಿ ಇದೆ, ಏಕೆಂದರೆ ಅದರ ಬದಲಾಗಿ ನನಗೆ ಬುಜ್ಜಿ ಪಾತ್ರವನ್ನು ಮಾಡಲು ಸಾಧ್ಯವಾಯಿತು. ಅವರು ನನಗೆ ಕರೆ ಮಾಡಿ, ‘ನಾನು ಚಿತ್ರದಲ್ಲಿ ನೀವು ಇರಲೇಬೇಕೆಂದು ಬಯಸುತ್ತೇನೆ’ ಎಂದರು. ನಂತರ ಅವರು, ‘ಸಿನಿಮಾನಲ್ಲಿ ಒಂದು ಆಸಕ್ತಿದಾಯಕ ಪಾತ್ರವಿದೆ, ಅದು ಕೇವಲ ಧ್ವನಿ ಮಾತ್ರ. ಅಂದರೆ ನೀವು ಎಐ ಬಾಟ್‌ಗೆ ಧ್ವನಿ ನೀಡಬೇಕು’ ಎಂದರು. ಮೊದಲಿಗೆ ನನಗೆ ಅದು ಅರ್ಥವಾಗಲಿಲ್ಲ, ಹಾಗಾದರೆ ಶೂಟಿಂಗ್‌ಗೆ ನನ್ನ ಅಗತ್ಯವಿಲ್ಲವೇ? ಎಂದು ಕೇಳಿದೆ. ಅವರು, ‘ಇಲ್ಲ, ನನಗೆ ಕೇವಲ ನಿಮ್ಮ ಧ್ವನಿ ಮಾತ್ರ ಬೇಕು’ ಎಂದರು. ನಾನು ತಕ್ಷಣ ವಾವ್, ಇದು ತುಂಬ ಭಿನ್ನವಾಗಿದೆ, ಖಂಡಿತ ಮಾಡುತ್ತೇನೆ ಎಂದೆ’ ಎಂದು ಕೀರ್ತಿ ತಿಳಿಸಿದ್ದಾರೆ.

ಇದನ್ನೂ ಓದಿ:ನಟಿ ಕೀರ್ತಿ ಸುರೇಶ್ ಮನೆ ಎಷ್ಟು ಅದ್ಧೂರಿಯಾಗಿದೆ ನೋಡಿ

ಕೀರ್ತಿ ಸುರೇಶ್ ಅವರು ‘ಕಲ್ಕಿ 2898 ಎಡಿ’ ಚಿತ್ರದಲ್ಲಿ ತೆರೆಯ ಮೇಲೆ ಕಾಣಿಸಿಕೊಳ್ಳದಿದ್ದರೂ, ‘ಬುಜ್ಜಿ’ ಎಂಬ ಎಐ ಬಾಟ್​​ಗೆಗೆ ಅವರು ಧ್ವನಿ ನೀಡಿದ್ದಾರೆ. ‘ಕಲ್ಕಿ 2898 ಎಡಿ’ ಸಿನಿಮಾದ ಅತ್ಯಂತ ಆಕರ್ಷಕ ಅಂಶಗಳಲ್ಲಿ ಒಂದಾಗಿತ್ತು ಬುಜ್ಜಿ. ಎಐ-ಚಾಲಿತ ವಾಹನದ ತಮಾಷೆಯ ಮಾತುಗಳು, ಭಾವನಾತ್ಮಕ ಕ್ಷಣಗಳು ಮತ್ತು ಪ್ರಭಾಸ್ ಅವರ ಪಾತ್ರದೊಂದಿಗೆ ನಡೆಸುವ ಹಾಸ್ಯ ಚಟಾಕಿಗಳು ಪ್ರೇಕ್ಷಕರ ಮನ ಗೆದ್ದವು. ಕೀರ್ತಿ ಅವರ ಧ್ವನಿಯು ಆ ಬುಜ್ಜಿ ಎಂಬ ಬಾಟ್​​ಗೆ ಜೀವಕಳೆ, ಹಾಸ್ಯ ಮತ್ತು ವ್ಯಕ್ತಿತ್ವವನ್ನು ನೀಡಿತು, ಇದರಿಂದ ವಿಮರ್ಶಕರು ಮತ್ತು ಚಿತ್ರಪ್ರೇಮಿಗಳಿಂದ ಅಪಾರ ಮೆಚ್ಚುಗೆ ವ್ಯಕ್ತವಾಯಿತು.

ಕೀರ್ತಿ ಸುರೇಶ್ ಅವರು ಕೈಯಲ್ಲಿ ಹಲವು ಸಿನಿಮಾಗಳನ್ನು ಹೊಂದಿದ್ದಾರೆ. ‘ಸತ್ಯವಾನ್ ಸಾವಿತ್ರಿ’, ‘ರಫ್ತಾರ್’, ‘ಅಕ್ಕ’, ‘ರೌಡಿ ಜನಾರ್ದನ’ ಮತ್ತು ದಗ್ಗುಬಾಟಿ ವೆಂಕಟೇಶ್ ಅವರೊಂದಿಗೆ ಒಂದು ಮುಂಬರುವ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ